"Uyim o‘quv markaziga aylantirilgach, mehmonlarni eshikdan kuzatganman"
Ishtixon tumani Yo‘g‘ontepa mahallasida yashovchi Ziyodulla Xo‘janov 36 yildan buyon ta’lim sohasida ishlab keladi. Uning tashabbusi bilan mahallada o‘quv markazi foydalanishga topshirildi.
- 1986 yilda o‘qituvchilik faoliyatimni tumanimizdagi 55-maktabda boshlaganman, - deydi Ziyodulla Xo‘janov. – Keyinchalik tumandagi 85 va 31-maktablarda tarix, huquq, geografiya fanlaridan dars berdim. Tushdan keyin o‘quvchilar uchun to‘garak va qo‘shimcha dars tashkil qildim. 1998 yilda 3 nafar o‘quvchim oliygohga o‘qishga kirdi. Shundan so‘ng, ko‘pchilik ota-onalar, o‘quvchilar qo‘shimcha dars o‘tishni so‘rashdi. To‘g‘risi, o‘qiyman, ilm o‘rganaman degan o‘quvchilarga yo‘q deya olmadim. 2001 yilda uyda qo‘shimcha o‘quv kursi tashkil qildim va ro‘yxatdan o‘tib, yakka tartibda repetitorlik qila boshladim.
Yiliga 100 nafar bola tayyorlagan bo‘lsam, 40-50 nafargacha o‘quvchi oliygohga qabul qilinardi. Farzandlarim ulg‘ayib o‘qishga kirgach, ularni ham yonimga oldim va 2011 yilda oilaviy korxona tashkil qildik. Ishonasizmi, uyim o‘quv maskaniga aylandi, mehmonlarni eshikdan kuzatgan vaqtlarimiz ham bo‘lgan.
O‘tgan yil faoliyatimizni yanada kengaytirish maqsadida “Nuriddin Xusni Ziyo” o‘quv markazini tashkil qildik va 200 nafar o‘quvchimizdan 140 nafari, joriy yil esa 76 nafar o‘quvchi oliygohga o‘qishga kirdi. O‘quvchilarga yanada qulaylik yaratish maqsadida O‘qituvchi va murabbiylar kunida 220 o‘ringa mo‘ljallangan yana bir o‘quv markazi foydalanishga topshirildi.
O‘quv markazining ochilish marosimida tuman hokimligi, O‘zbekiston Yozuvchilar uyushmasi viloyat bo‘limi va viloyat xalq ta’limi boshqarmasi mas’ullari hamda oliy ta’lim mussasalari o‘qituvchilari ishtirok etdi.
Ushbu markazning qulayligi shundaki, oldin o‘quvchilar to‘rt-beshta fandan tayyorlangan bo‘lsa, endi 10 ga yaqin o‘zlari qiziqqan yo‘nalishga o‘qishga kirish uchun tayyorlanishi, bunga qo‘shimcha ravishda 2-4-sinf o‘quvchilari ham darsdan bo‘sh vaqtida ingliz, fransuz va rus tillarida so‘zlashuvni, 9-11 sinflar grammatika va so‘zlashuvni o‘rganishi va chet tili sertifikatini olish uchun tayyorlanishi mumkin. Darslarni o‘tish uchun oliy ta’lim muassasalari va maktablardan 15 nafar malakali o‘qituvchi jalb qilingan.
Fazliddin Ro‘ziboyev.
