Yaponiyada “Fukusima-1” AES filtrlariga katta zarar yetkazilgani aniqlandi
“Fukusima-1” favqulodda atom elektr stansiyasining operatori TEPCO radioaktiv suvni tozalovchi ALPS tizimidagi 25 filtrdan 24 tasi shikastlanganligini aniqladi, deb xabar beradi NHK.
Ekspertlar o‘tgan oy oxirida birinchi nuqsonlarni aniqlagandan so‘ng, keng ko‘lamli tekshiruv boshlandi.
Kompaniya radioaktiv suv oqishi holatlarini hali qayd etmaganiga qaramay, ularning paydo bo‘lish ehtimolini istisno qilib bo‘lmaydi.
O‘xshash muammo stansiyada ikki yil oldin ham bo‘lgan. O‘shanda TEPCO sababni aniqlay olmadi. Operator filtrlarni o‘zgartirdi va ish davom etdi.
“Fukusima-1” AESdagi avariya 2011 yil 11 martda kuchli zilzila va sunami natijasida sodir bo‘ldi. Radiatsiya oqishi tufayli hukumat Fukusima prefekturasining sharqiy tumanlar aholisini evakuatsiya qildi. Amalga oshirilgan zararsizlantirish tufayli ularning ayrimlarida maxsus rejim olib tashlandi va odamlarga uylariga qaytishga ruxsat berildi. Ba’zi hududlar hali ham yashashga yaroqsiz. TEPCO hisob-kitoblariga ko‘ra, oqibatlarini bartaraf etish va reaktorlarni demontaj qilishga taxminan 40 yil kerak bo‘ladi.
Aprel oyi oxirida Yaponiya hukumati 2023 yildan boshlab tritiydan tashqari, radioaktiv suvni 62 radioaktiv elementdan tozalaydigan ALPS tizimida ishlangan suvni okeanga to‘kishga ruxsat berish to‘g‘risida qaror qabul qildi. Bu Rossiya, Xitoy, Janubiy Koreya va KXDRda xavotir uyg‘otdi. Shu bilan birga, MAGATE qo‘llab-quvvatlashi va monitoring uchun mutaxassislar guruhini yuborish niyati borligini bildirdi.
O‘ttizta tashkilot, Yaponiya baliqchilik kooperativlari uyushmalari federatsiyasi, shuningdek Fukusima, Miyagi va Ibaraki prefekturalari baliqchilar uyushmalari Fukusima-1 AESi suvlarini dengizga tushishiga qarshi. Fukusima prefekturasida 41 munitsipalitet noroziligini e’lon qildi - bu umumiy aholisining 70 foizini tashkil qiladi.
