Android qurilmalar uchun Zarnews.uz mobil ilovasi. Yuklab olish x

O‘zbekistondan katta miqdorda oltin olib chiqib ketayotganlar qo‘lga tushdi

DXX xodimlari tomonidan Toshkent viloyatining “G‘ishtko‘prik” xalqaro o‘tkazish punktida o‘tkazilgan tezkor tadbirda Andijon viloyatida yashovchi fuqarolar S.O., R.F., K.G., A.M. va R.A.lar 1 kilogramm 168 gramm og‘irlikdagi tilla buyumlarni Qozog‘istonga olib chiqib ketmoqchi bo‘lishganida to‘xtatib qolindi.

Shuningdek, “G‘ishtko‘prik” xalqaro o‘tkazish punktida DXX va bojxona qo‘mitasi xodimlari tomonidan o‘tkazilgan boshqa bir tadbirda esa Andijon shahrida yashovchi N.B. va uning turmush o‘rtog‘i M.O‘.larning 1 kilogramm 116 gramm og‘irlikdagi oltin buyumlarni ikki yoshli nabirasi tagligi (pampers) orasiga yashirib, mamlakatimizdan olib chiqib ketishiga chek qo‘yildi.

Aniqlanishicha, har ikki holatda ham qonunbuzarlar oltin buyumlarni Qozog‘iston orqali Hindiston davlatiga olib borib sotishni rejalashtirishgan.

DXX xodimlari Toshkent viloyati hududida yana bir noqonuniy xatti-harakatga chek qo‘ydi. Ma’lum bo‘lishicha, mahalliy fuqaro M.D. ko‘p vaqtdan buyon Angren va Olmaliq shaharlari yaqinidagi yopiq shaxtalardan noqonuniy qazib olingan oltinni andijonlik N.U.ga sotib kelgan.

M.D. navbatdagi oltin quymalarni N.U.ga uning qarindoshi T.M. orqali berib yuboradi. T.M. boshqaruvidagi “Lasetti” rusumli avtomashina Andijon shahriga kirib kelgan vaqtida to‘xtatilib tekshirilganda 1 kilogramm 476 gramm og‘irlikdagi oltin quymalar, shuningdek, 14 ming AQSh dollari va 8,9 million so‘m borligi aniqlanib, protsessual tartibda rasmiylashtirib olindi.

Tergovoldi surishtiruv ishlari vaqtida T.M. oltin quymalarni N.U.ning iltimosiga ko‘ra, M.D.dan 63 ming AQSh dollariga sotib olganligini bildirdi.

Shundan so‘ng tezkor tadbir davom ettirilib, N.U. ushlandi va zargarlik buyumlari yasab sotish maqsadida muqaddam M.D.dan oltin quymalarni sotib olganligini tan oldi.

Aniqlangan barcha holatlar bo‘yicha O‘zbekiston Respublikasi Jinoyat Kodeksining tegishli moddalariga muvofiq jinoyat ishlari qo‘zg‘atilib, tergov harakatlari olib borilmoqda.

Bundan tashqari, Toshkent viloyati fuqarosi G‘.R. “Qamchiq” dovoni hududida joylashgan umumiy ovqatlanish shoxobchalarining birida namanganlik G‘.A.ga qariyb 1 kilogramm og‘irlikdagi oltin quymalarni 294 million 600 ming so‘mga sotayotganida ularning har ikkisi qo‘lga olindi.

Jinoyat ishlari bo‘yicha Namangan viloyati Pop tumani sudi hukmiga ko‘ra, G‘.R. 4 yil muddatga, G‘.A. 3 yil muddatga ozodlikdan mahrum qilindi.