"Агробанк" Пахтачида бир йилдан буён кредит ололмаётган тадбиркор муаммосига муносабат билдирди: "Электрон навбат асосида кредит ажратилди"
5 апрель куни сайтимизда “Банк, ҳокимият, ёрдамчи. Бу “учбурчак”дан кредит излаётган тадбиркор” сарлавҳали мурожаат эълон қилинган эди.
Унда кўтарилган масала юзасидан таҳририятимизга “Агробанк”нинг Пахтачи филиали бошқарувчиси М.Бобоев имзоси билан жавоб хати келди. Унда жумладан, шундай дейилади:
“Фуқаро А.Ботировнинг турмуш ўртоғи М.Ўроқова 2021 йил 29 мартда якка тартибдаги тадбиркорлик билан шуғулланиш учун давлат рўйхатидан ўтиб, филиалимизда ҳисоб-рақам очган. Ушбу давр мобайнида тадбиркор банкка кредит олиш тўғрисида мурожаат қилмаган.
М.Ўроқова 2022 йил 16 мартда “Oilakredit.uz” электрон платформаси орқали асбоб-ускуна сотиб олиш мақсадида имтиёзли кредит расмийлаштириш учун талабнома юборган. 2022 йил 18 мартда ҳоким ёрдамчиси томонидан кредит берилиши тўғрисида тавсиянома берилган ва шу куннинг ўзида банк ҳамда фуқаро томонидан икки томонлама кредит шартномаси электрон калит орқали имзоланиб, кредит қайтмаслиги хатари олди олинишини суғурталаш мақсадида суғурта компаниясига электрон тарзда кредит шартномаси жўнатилган. 30 мартда суғурта компанияси томонидан жавоб хати келгандан сўнг электрон навбат асосида 5 апрелда 28 890 000 (йигирма саккиз миллион саккиз юз тўқсон минг) сўм кредит маблағи фуқаро томонидан шартнома тузган таъминотчига кўчириб берилган”.
