Ҳеч нарсага қарамай тирик қолиш...

Бу омадли одамларнинг қиссалари мўъжизани эслатади. Улар турли ҳалокатлардан омон қолди: чўкиб кетган кемада уч кун жон сақлаб, ҳатто ўққа тутилгандан кейин ҳам уйларига қайтишга муваффақ бўлди.

Оғир жароҳатлар ва ғайриинсоний шароитларга қарамай, улар инсон омон қолиш учун кўп синовларга дош беришига қодир эканлигини яна бир бор исботлаб берган.

Венсеслао Могуэль: ўлим жазосидан кейинги ҳаёт

Мексика инқилоби пайтида исёнчилар томонида жанг қилган талаба Венсеслао Могуэль 1915 йилнинг март ойида ҳибсга олинди ва судсиз ўлимга ҳукм қилинди. Аскарлар инқилобчини деворга суяб, унга қарата тўққиз марта ўқ узишди, унинг ўлганига ишонч ҳосил қилиб чиқиб кетишди. Ҳеч қандай шубҳа йўқ эди, чунки жаллодлардан бири Венсеслаонинг бошига назорат ўқини ҳам узган эди.

Қатл қилинган йигит нафақат омон қолди, балки уч квартал масофа ўрмалаб юриб ўтиб, ўртоқлари олдига етиб олди. У ерда унга ёрдам кўрсатилди. Ўтган асрнинг 30-йилларда дунё юзидаги чуқур яра излари ва бузилган жағи билан тирик қолган йигитнинг мўъжизавий қутқарилиши ҳақида билиб олди.

Бундан ташқари, Венсеслао машҳур телекўрсатувлар меҳмони бўлди. 1937 йилда олинган машҳур фотосуратда у Американинг “Рипли ишонадими ёки йўқми!” радио-шоусининг бошловчиси Роберт Риплига интервью беряпти.

Анжела Эрнандес: 60 метрлик қоядан қулаш

Америкалик Анжела Эрнандес синглисини кўриш учун Лос-Анжелесга кетаётган эди. У алоқага чиқмай қолганида, оиласи хавотирга тушди. Аниқланишича, қиз йўл устига отилиб чиққан қуённи урмасликка уринганида машина бошқарувини йўқотган экан. Машина 60 метрлик қоядан қум қирғоғи устига қулаб тушди ва 23 ёшли Анжела омон қолди.

Миядаги қон қуйилиш, қовурғалар, ўмров суягининг синиши ва ўпка фаолиятининг сусайишига қарамай, у кабинадан чиқиб олиб, бир ҳафта давомида Тинч океанининг чўл қирғоғида омон қолиш учун ҳаракат қилди.

“Танамдаги барча суяклар оғрир эди”, - эслайди қиз. Қутқарилишини кутаётиб, у радиатор шланги билан ёмғир сувини йиғди, чалғимаслик учун севимли қўшиқларини куйлар ва уй овқати ҳақида орзу қиларди.

Бу вақт давомида Анжела Эрнандес юқоридан ўтиб кетаётган машиналарни кузатар, аммо ҳайдовчилар уни кўрмасдан ўтиб кетаверар эди. Ниҳоят, машинаси қолдиқларини кўриб қолган бир неча серфингчилар уни топиб олди ва дарҳол қутқарувчиларни чақирди. “Ўшанда ҳаётимда бахтли бўлиш учун ҳамма нарсам борлигини англаб етдим”, деб ёзган эди Анжела касалхонада.

Харрисон Окене: Чўкиб кетган кемада уч кун

2013 йилнинг 26 май куни тонгда кемаси чўкиб кетаётган пайтда кема ошпази Харрисон Окене душхонада эди. Воқеа Нигерия қирғоқларидан 30 километр узоқликда содир бўлди, ўша кунлардаги кучли бўрон туфайли ғаввослар уч кун давомида чўкиб кетган кемага туша олишмади. Улар ҳатто шошиб ҳам ўтирмади, негаки, тирик қолганлар топилишига кўзи етмасди. Бироқ, Харрисон Окене жон сақлади.

У кеманинг ярим сув босган қоронғу коридорларидан югуриб ўтиб, ҳаво чўнтаги ҳосил бўлган, сув етиб бормайдиган хоналардан бирида паноҳ топди.

Эркак сув устида қолиш учун қўлига тушган материаллардан кичик сол ясади. У ичимлик суви ва ҳаво етишмаслигидан ёки совиб кетишдан ҳалок бўлиши мумкин эди. Ошпазнинг ёнида фақат бирқути газланган сув бор эди ва шу давр давомида у белигача совуқ сувда турди.

Бундан ташқари, ўлган экипаж аъзоларининг ҳиди йиртқич балиқларни жалб қиларди. Харрисон жасадларни олиб чиқиш учун келган қутқарувчиларнинг бирини қўлидан ушлаб олганида, унинг ҳайратда қолганини тасаввур қила оласизми? Шу тариқа ошпаз қутқарилиб, ушбу таъсирли учрашув лаҳзаси видеога олинди.

Баҳора Муҳаммадиева тайёрлади.