СамДУда янги ўқув йилидан қандай йўналишлар очилди?
- Шароф Рашидов номидаги Самарқанд давлат университетида 2022-2023 ўқув йилидан бакалавриат кундузги таълим шаклида фалсафа (йўналишлар бўйича), рақамли иқтисодиёт (тармоқлар ва соҳалар бўйича), банк иши ва аудити, инсон ресурсларини бошқариш, агробизнес ва инвестицион фаолият, сунъий интеллект йўналишлари очилди, - дея хабар берди Zarnews.uz'га СамДУ қабул комиссияси масъул котиби Раҳматилла Мирзаев.
Университетнинг бакалавриат кечки таълим шакли бўйича филология ва тилларни ўқитиш: ўзбек тили, рус тили, тожик тили йўналишлари, шунингдек, агробизнес ва инвестицион фаолият, юриспруденция (фаолият турлари бўйича), биология (турлари бўйича), география йўналишлари очилди ва уларнинг ҳар бирига 25 нафардан талаба ўқишга қабул қилинади.
Бакалавриатнинг сиртқи таълим шакли бўйича филология ва тилларни ўқитиш: рус тили ва тожик тили йўналишлари, шунингдек, рақамли иқтисодиёт (тармоқлар ва соҳалар бўйича), юриспруденция (фаолият турлари бўйича) йўналишлар ташкил этилди.
Янги ўқув йилидан университет қошида Агробиотехнологиялар ва озиқ-овқат хавфсизлиги институти, Муҳандислик физикаси институти ҳамда Ургут филиали очилмоқда.
Агробиотехнологиялар ва озиқ-овқат хавфсизлиги институти бакалавриат кундузги таълим шаклида ушбу соҳага оид университетдаги мавжуд йўналишлар билан бирга қишлоқ хўжалиги экинлари селекцияси ва уруғчилиги (экин турлари бўйича), зооинженерия: балиқчилик йўналишлари очилди.
Бакалавриатнинг сиртқи таълим шаклида эса зооинженерия: балиқчилик; мевачилик ва узумчилик; сабзавотчилик, полизчилик ва картошкачилик; иссиқхона хўжалигини ташкил этиш ва юритиш йўналишлари ташкил этилди.
Университетнинг Ургут филиалида бакалавриатнинг кундузги таълим шаклида мактабгача таълим, бошланғич таълим, математика ва информатика, кимё, биология, ўзбек тили ва адабиёти, ўзга тилли гуруҳларда рус тили, хорижий тил ва адабиёти: инглиз тили, бухгалтерия ҳисоботи ва аудит, банк иши ва аудит, бизнесни бошқариш (тармоқлар бўйича), ахборот тизимлари ва технологиялар (тармоқлар ва соҳалар бўйича) йўналишлари очилди.
