30 ming dollarni o‘margan 3 nafar ayolga jinoyat ishi qo‘zg‘atildi
2020 yilning 20 sentyabr kuni soat 14:30 da noma’lum shaxslar Denov shahrida bo‘lgan “Denov-bobodehqon” bozorida joylashgan, 39 yoshli F.S.ga (ayol) tegishli zargarlik do‘konining savdo rastasida turgan, umumiy bahosi 30.000 AQSh dollari bo‘lgan har xil turdagi qimmatbaho ayollar taqinchoqlarini yashirin ravishda talon-toroj qilib, hodisa joyidan yashiringan.
Hodisa sodir bo‘lgan joy tergov-tezkor guruhi tomonidan ko‘zdan kechirilib, savdo do‘koniga kirish yo‘lagida o‘rnatilgan kuzatuv kamerasi yozuvlari tekshirib ko‘rilganida, o‘g‘irlik sodir bo‘lgan vaqtda savdo do‘konidan uch nafar ayol bir vaqtda chiqib ketganligi va ulardan birining qo‘lida kiyimga o‘ralgan narsa borligi aniqlangan.
Mazkur holat yuzasidan Denov tumani IIO FMB huzuridagi tergov bo‘limi tomonidan noma’lum shaxslarga nisbatan Jinoyat kodeksining 169-moddasi 4-qismi “a” bandi (o‘g‘irlik) bilan jinoyat ishi qo‘zg‘atilgan.
Olib borilgan tezkor-qidiruv harakatlari natijasida, ushbu jinoyatni 19 yoshli X.D., 28 yoshli N.Sh. va 52 yoshli O.R.lar (barchasi ayollar) sodir etganligi aniqlanib, ulardan talon-toroj qilingan taqinchoqlar ashyoviy dalil tariqasida rasmiylashtirib olingan.
O‘zbekiston Respublikasi IIV huzuridagi Tergov departamenti xabariga ko‘ra, jinoyat sodir etgan shaxslar gumon qilinuvchi tariqasida jalb qilingan. Tilla taqinchoqlar egasiga to‘liq qaytarib berilgan.
Hozirda tergov harakatlari davom ettirilmoqda.
