Biz birgamiz: aholining ehtiyojmand qatlamini qo‘llab-quvvatlashga qaratilgan xayrli loyihaga start berildi
Aholini ijtimoiy muhofaza qilish va qo‘llab-quvvatlash maqsadida Adliya vazirligi 2018 yildan buyon “Biz birgamiz!” ijtimoiy loyihasini yo‘lga qo‘ygan. Loyiha doirasida aholining zaif qatlamlariga ijtimoiy va iqtisodiy ko‘mak berishga alohida e’tibor qaratib kelinmoqda.
Koronavirus infeksiyasi tarqalishiga qarshi kurashish maqsadida insonlarning harakatlanishiga ayrim cheklovlar kiritilganligi natijasida avvalo, aholining ehtiyojmand qatlami, ya’ni kam ta’minlangan oilalar, yolg‘iz keksalar, nogironligi bor shaxslar va ishsiz fuqarolarni zaruriy mahsulotlar bilan ta’minlash ehtiyoji ortmoqda.
Bunday sharoitda Shodiyev xalqaro fondi O‘zbekiston Respublikasi Hukumati tomonidan olib borilayotgan chora-tadbirlarga o‘zining hissasini qo‘shishga va dastlabki bosqichda aholining kam ta’minlangan qatlamiga moddiy ko‘mak berishga tayyorligini ma’lum qildi.
Olib borilgan o‘rganishlar natijasida Adliya vazirligi, Shodiyev xalqaro fondining O‘zbekistondagi vakolatxonasi va “Madad” nodavlat notijorat tashkilotlari tomonidan respublika bo‘yicha 1 500 dan ortiq yordamga muhtoj oilalar aniqlandi. Fondning yordami bilan jami 13 turdagi birlamchi oziq-ovqat mahsulotlari va tibbiyot vositalarini o‘z ichiga olgan ijtimoiy yordam to‘plamlari shakllantirildi.
Mazkur ijtimoiy yordam to‘plamlari ortilgan avtoulovlar respublikaning olis hududlarida yashovchi yurtdoshlarimizga yetkazish uchun yo‘lga chiqdi. Ijtimoiy yordam to‘plamlarini egalariga topshirish paytida hududiy adliya organlari va “Madad” nodavlat notijorat tashkilotining joylardagi filiallari tomonidan ularga huquqiy tushuntirishlar beriladi.
Shu o‘rinda, Adliya vazirligi va Fond barchani o‘z fuqarolik mas’uliyatlarini to‘liq his etishga, o‘rnatilgan qonun-qoidalar va tartiblarga so‘zsiz rioya etishga, bu borada kechayu-kunduz xizmat qilayotgan tashkilotlar xodimlariga, ayniqsa, shifokorlarga hurmat bilan munosabatda bo‘lishga chaqiradi.
