Bugun Samarqand shahridagi Ibn Sino ko‘chasining bir qismida transport harakati vaqtincha cheklanadi
Shahar hokimligi xabariga ko‘ra, bugun, 21 dekabr kuni Samarqand shahridagi Ibn Sino ko‘chasi 17-uyda School 21 bepul IT maktabining birinchi kampusi ochiladi.
Muassasaning ochilishi munosabati bilan soat 14:00 dan 19:00 gacha Rudakiy va Ibn Sino ko‘chasining oraliq qismida joylashgan "Olimpiya" stadionida "Musiqa bilan dasturlang" nomli konsert dasturi ham tashkil etiladi.
Shu munosabat bilan Samarqand shahar hokimi farmoyish asosida hududda harakat xavfsizligini ta’minlash maqsadida Ibn Sino ko‘chasining Dahbed ko‘chasi bilan kesishmasidan Bo‘stonsaroy va Rudakiy ko‘chasi kesishmasigacha bo‘lgan qismida tadbir o‘tkaziladigan vaqtda transport vositalarining harakati cheklanadi.
Eslatib o‘tamiz, ushbu vaqtda Rudakiy ko‘chasining Bo‘stonsaroy ko‘chasi bilan kesishmasida joylashgan tonnel osti va usti bo‘ylab transport vositalarining harakati davom etaveradi, deyiladi xabarda.
