Buyuk Britaniya: Liz Trass kabinetidagi ikkinchi iste’fo
Buyuk Britaniya ichki ishlar vaziri Suella Braverman Bosh vazir Liz Trass kabinetining iqtisodiy siyosati, xususan, daromad solig‘ini kamaytirish bo‘yicha keskin o‘zgarishlari bilan norozi bo‘lgani uchun iste’foga chiqdi. Sobiq transport vaziri Grant Shepps ichki ishlar vazirligining yangi rahbari etib tayinlandi.
Ichki ishlar vazirligi rahbarining iste’foga chiqishi amaldagi hukumat tarkibida ikkinchisidir. Vazirlar mahkamasidan birinchi bo‘lib moliya vaziri – moliya kansleri Kvazi Kvarteng chiqib ketdi. Hukumat rahbari birinchi navbatda, leyboristlar (ikki yetakchi siyosiy partiyalardan biri) muxolifatining qattiq tanqidiga uchramoqda. Uning rahbari Kir Starmer Britaniya parlamenti Jamoatlar palatasi yig‘ilishida shunday dedi:
"Mana mening ro‘yxatim: 45 foiz soliq, korporativ soliq imtiyozlari va soliqni 20 foizga kamaytirish bekor qilindi. Ikki yillik energiya narxini muzlatish, soliqsiz xaridlar bekor qilindi. Eng yaxshi do‘st deyilgan sobiq kansler, u ham yo‘q. Hech narsa yo‘q. Nega u hali ham shu yerda?!".
“Men jangchiman, qo‘rqoq emas. Iqtisodiy barqarorlikni ta’minlash uchun milliy manfaatlar uchun harakat qildim” deb javob berdi unga Liz Trass.
Ammo bosh vazir tanqidchilarining aytishicha, u e’lon qilgan siyosat uning shaxsiy qarori bo‘lgan va hatto Trassning ba’zi tarafdorlari uning mavqeini «bo‘sh» deb bilishadi.
O‘tgan hafta hukumat rahbari moliyalashtirilmagan soliqlarni qisqartirish paketini qayta ko‘rib chiqishni boshladi. Bu esa qarz olish xarajatlarini oshirdi va funt sterling va davlat obligatsiyalari pasayishi fonida Angliya bankini aralashishga majbur qildi.
