Dam olish kuni qator hududlarda kuchli yomg‘ir yog‘ishi aytilmoqda
"O‘zgidromet" xabariga ko‘ra, ertaga O‘zbekistonning katta qismida quruq va iliq ob-havo saqlanib turadi. Faqat Qoraqalpog‘istonda, Xorazm viloyatida va cho‘l hududlarining ba’zi joylarida Volga bo‘yi hududlaridan nam va nisbatan salqin havo kirib kelishi hisobiga qisqa muddatli yomg‘ir yog‘adi.
Yakshanba kuni nam havo massasi O‘zbekistonning barcha hududlarini qamrab oladi. Mamlakatning turli hududlarida yomg‘ir yog‘adi, momaqaldiroq bo‘lishi mumkin.
Toshkent, Samarqand, Jizzax, Sirdaryo va Farg‘ona viloyatlarining ba’zi joylarida yomg‘ir kuchli bo‘ladi. Havo harorati biroz pasayadi va kunduzi +20...+25 darajadan yuqori bo‘lmaydi.
25 aprel dushanba kuni O‘zbekistonning markaziy va sharqiy hududlarida yomg‘ir yog‘ishi saqlanib turadi. 24-25 aprelda tog‘ oldi va tog‘li hududlarda sel kelishi xavfi mavjud.
