Hokim ijodkor o‘qituvchilar bilan uchrashdi

Kattaqo‘rg‘on tuman hokimi A.Bahromov "Ijodkor o‘qituvchi" respublika tanlovi g‘oliblari, ustoz-murabbiylar, shoirlar va adabiyot ixlosmandlari bilan uchrashuv o‘tkazdi.

Mazkur "Ma’naviyat soati"da yosh avlodni vatanga sadoqat ruhida kamol toptirishda oila, maktab, mahallaning hamkorligi, o‘qituvchining roli, yoshlarimizda ezgulik, mehr-shafqat, mehnatsevarlik, halollik, diyonat, oqibatlilik kabi umuminsoniy fazilatlarni shakllantirish haqida samimiy suhbat qilindi.

- San’atni, ijodni sevuvchi kishidan hech qachon yomonlik chiqmaydi, - dedi A.Bahromov. - Ijodiy muhitni samarali yo‘lga qo‘yish, yoshlarga ijod sirlaridan saboq berish, ezgulik ulashish har birimizning oldimizda turgan mas’uliyatli vazifalardan biridir. Bunday ezgu maqsadlarga erishish uchun turli ijodiy suhbatlar tashkil etish, jumladan "Kattaqo‘rg‘on haqiqati" gazetasi qoshida tashkil etilgan "Ilhom" to‘garagi faoliyatini takomillashtirish, yoshlarimizni ijodga jalb etish lozim.

Aziza BOYMURODOVA.