Hokim yordamchisi Obihayotda qanday o‘zgarish qila oldi?
- Faoliyatimni xatlov jarayonidan boshladim. Natijada 156 nafar ishsiz fuqaro mavjudligi aniqlandi. Tuman mutasaddilari, mahalla faollari bilan hamkorlikda bu muammoning yechimini topishga kirishdik. Dehqonchilikka qiziquvchi 60 nafar fuqaroga “E-auksion” platformasi orqali yer berildi. 23 nafari “Temir daftar”ga kiritilib, ularga subsidiyalar ajratildi. 20 nafarga yaqin ishsizlar tijorat banklari tomonidan imtiyozli kreditlar ajratilishi hisobiga tadbirkorlik faoliyatini boshlab, bandligi ta’minlandi.
Bu Narpay tumani Obihayot mahallasidagi hokim yordamchisi Abbosjon Murodovning gapi.
- Ular ish boshlagach, mahalla aholisini qiynab kelayotgan muammolarga ham yechim topilyapti, - deydi u. - Masalan, yaqinda ochilgan mahalla tibbiyot punkti yonida dorixona va sport-sog‘lomlashtirish majmuasi, 75 o‘ringa mo‘ljallangan oilaviy bog‘cha, maishiy xizmat ko‘rsatish nuqtalari qishloq aholisi uzog‘ini yaqin qildi.
Ahamiyatlisi, dehqonchilik va tadbirkorlik bilan shug‘ullanishni boshlaganlarning aksariyati xotin-qizlardir.
- Faoliyatim boshlashim bilan birinchilardan bo‘lib Tama qishlog‘ida yashovchi Madina Shotirova murojaat qildi, - deydi A.Murodov. – Dastlab, qo‘lidan nima kelishini so‘radim. U yer ajratilsa dehqonchilik bilan ham shug‘ullanishi mumkinligini, asosiysi, maqsadi ishli bo‘lib, ro‘zg‘origa foydasi tegishi kerakligini aytdi. Ishonib-ishonmay unga yer ajratilishiga ko‘maklashdim. Bugun uning mehnati samarasini ko‘rib, ko‘zim quvnaydi.
- Bolaligimdan dehqonchilikka qiziqqanman, - deydi Madina. - Menga ajratilgan 20 sotix yerning asosiy qismiga pomidor ekdim. Bu yerdagi og‘irroq yumushlarga turmush o‘rtog‘im ishdan bo‘sh vaqtlarida yordam beradi. Hosil yomon bo‘lmadi. Xaridorlar mahsulotlarimizni shu yerning o‘zidan sotib olishyapti. Bozorga ko‘tarib yurmaymiz. Kuniga 500-600 ming so‘mlik pomidor sotyapman. Bir mavsumda pomidorning o‘zidan 20 million so‘m daromad qilsa bo‘larkan.
Mahallada yana ishsiz ayollarning bandligini ta’minlash maqsadida tikuvchilik yo‘nalishida kooperatsiya ham tashkil qilinyapti.
To‘lqin Siddiqov,
Husan Eltoyev (foto).
