Markaz buyuk allomalarimiz asarlarini taqdim etdi
Imom Moturidiy yodgorlik majmuasida Imom Moturidiy xalqaro ilmiy-tadqiqot markazi tomonidan nashr qilingan kitoblar taqdimoti bo‘lib o‘tdi.
Unda O‘zbekiston xalqaro islom akademiyasi va Samarqand davlat universiteti professor-o‘qituvchilari, Imom Buxoriy xalqaro ilmiy-tadqiqot markazi, O‘zbekiston musulmonlari idorasining viloyat vakilligi, imom-xatiblar, Hadis ilmi oliy maktabi o‘qituvchilari, mahalliy va xorijlik olimlar hamda keng jamoatchilik vakillari ishtirok etdi.Tadbirida buyuk allomalarimizning ilmiy merosini keng jamoatchilikka yetkazish maqsadida Imom Moturidiyning “Ta’vilot al-Qur’on” asari 29-juzi, Mulla Ali Qorining “Sharh al-Fiqh al-akbar”, Burhoniddin Marg‘inoniyning “Hidoya” asarlarining o‘zbek tilidagi ilmiy-izohli tarjimalari hamda Markaz tomonidan nashr etilgan boshqa kitoblar taqdim etildi.
Taqdimotda moturidiylik ta’limotining tub mazmun-mohiyatini ochib berish Imom Moturidiy merosini o‘rganish va uning islom sivilizatsiyasi rivojiga qo‘shgan bebaho hissasini xalqaro miqyosda targ‘ib etishda muhim ahamiyat kasb etishi ta’kidlandi.
