Omonqo‘ton turizm qishlog‘iga aylantiriladi
Bu hudud aholisi xushmanzara tabiat, noyob o‘simlik dunyosi, toza havosi bilan tilga tushgan tog‘ bag‘rida yashaydi. Ular mavsumiy dam olish maskanlari tashkil qilgan. Bu omonqo‘tonliklar uchun nafaqat daromad manbai, balki ekoturizmni rivojlantirish va mahalliy aholining turmush tarzini yaxshilashga xizmat qilishi bilan ahamiyatli.
Bu yerdagi dam olish maskanlari bilan tanishish davomida mahalla raisi Abdug‘ani Ochilov aholining asosiy daromadi haqida gapirdi.
Qadimda hududdan Buyuk ipak yo‘li o‘tgan, - deydi A.Ochilov. – Tog‘lar orasida, Samarqand va Qashqadaryo viloyatlarini bog‘lovchi “Taxtiqoracha” dovonida joylashgan bu maskan doim mahalliy va xorijlik sayyohlar bilan gavjum. Mahalla hududi 8109 gektarni tashkil etadi va tarkibidagi uchta (Qizilto‘riq, Omonqo‘ton va Konsoy) qishloqda 3525 nafar aholi yashaydi. Hudud joylashuvi va imkoniyatidan kelib chiqib, turizmni rivojlantirish asosiy drayver sifatida belgilangan. Mahallamizda 25 ta dam olish maskani, 10 ga yaqin mavsumiy hordiq chiqaradigan joy, 30 ta xizmat ko‘rsatish shoxobchasi mavjud. Ochig‘ini aytaman, mahallamiz ahli bizga kamdan-kam murojaat qiladi. Bersang yeyman, ursang o‘laman, degan gap yo‘q. Tabiat bergan ne’matdan foydalanib, ko‘pchilik o‘zini o‘zi eplayapti.
Yaqinda Omonqo‘ton turizm qishlog‘iga aylantiriladi va hududimizdagi 20 gektar maydonda yirik turizm loyihasi amalga oshiriladi. Jumladan, joriy yilning may oyidan 20 ga yaqin lot auksionga chiqarilib, 3 ta mehmonxona, 5 ta restoran, sport maydonchalari, avtoturargoh, istirohat bog‘lari, dam olish maskanlari qurilishi boshlanadi. Loyihalar 2026 yil yakuniga qadar foydalanishga topshirilishi va hududning 200 nafardan ziyod aholisi doimiy ishga ega bo‘lishi rejalashtirilgan.
Hokim yordamchisi Sanjar Luqmonovning ta’kidlashicha, mahallada 1680 nafar fuqaro ish bilan ta’minlangan. 28 nafar ishsiz fuqaro va kambag‘al, deb topilgan besh oilaga xonadonida dam olish maskanlari tashkil qilish, chorvachilik bilan shug‘ullanishi va tikuvchilik uchun 560 million so‘m kredit, asbob-uskuna olishga subsidiyalar ajratilgan.
- Ko‘pchilik tabiat qo‘ynida hordiq chiqarish uchun hovlimizdan joy so‘rardi, ba’zida uyimizda ham joy yetishmasdi, - deydi Abdurasul Qashshamov. - Uch yil oldin yakka tartibdagi tadbirkor sifatida ro‘yxatdan o‘tib, “Daryo bo‘yi” dam olish maskanini tashkil qildik. Daromadimiz yaxshi, oila a’zolarim va mahalladagi besh nafar yosh ish bilan ta’minlagan.
- Uyimiz katta yo‘l yoqasida va bir tomondan tog‘lar bag‘ridan o‘tuvchi daryo bo‘yida joylashgan, - deydi Nodira Amonova. – 15 yil oldin qurut va hovlimizdagi mevalarni sotib faoliyat boshlagan edik. Ishlarimiz yurishib, keyingi yillarda “Rajab ota” mavsumiy dam olish maskanini ochdik. Endi hududni sayyohlar doimiy tashrif buyuradigan maskanga aylantirishni rejalashtiryapmiz. Buning uchun loyiha ishlab chiqdik va shu sohada faoliyat yuritayotgan tadbirkorlar bilan ham hamkorlik qilishga tayyormiz.
Hududdagi diqqatga sazovor joylardan yana biri tabiatni asrab-avaylash, o‘rmon va tog‘oldi hududlardagi yo‘qolib ketish xavfi ostida bo‘lgan o‘simlik va hayvonot dunyosini saqlab qolish va rivojlantirish maqsadida Vazirlar Mahkamasining 2022 yil 4 martdagi qarori asosida tashkil etilgan «Omonqo‘ton milliy tabiat bog‘i»dir. Milliy bog‘ direktori Azamat Amrullayevning ta’kidlashicha, hudud 1,5 gektar maydonni egallagan bo‘lib, uning 1000 gektari qo‘riqxona zonasi, 400 gektar rekreatsion va 100 gektari xo‘jalik yuritishga mo‘ljallangan. Bog‘da 1300 turdan ziyod noyob o‘simlik va daraxtlar, 120 turdan ortiq hayvon va jonzotlar yashaydi. O‘simlik va hayvonot dunyosini himoya qilish, xavfsizligini ta’minlash maqsadida hududda 15 nafar xodim faoliyat ko‘rsatmoqda.
Aytish joizki, Omonqo‘ton mahallasi hududining 9400 gektarini tabiiy hudud tashkil qiladi va bu yerda o‘suvchi noyob daraxtlar, dorivor o‘simliklar ko‘p. Xususan, “Qizil kitob”ga kiritilgan Zarafshon tog‘ archasi yoki yer yuzining boshqa hech qaysi joyida uchramaydigan Omonqo‘ton tog‘ lolasi. Keyingi paytda muhofazaga olinmagan bu hududlarda ana shunday noyob o‘simlik va daraxtlarga ziyon yetkazish, ularni yo‘q qilish, chorva mollarini boqish, granit toshlar qazib olish holatlari uchramoqda. Jumladan, hozir shu tog‘da o‘suvchi 101 turdagi o‘simlik muhofazaga muhtoj. Ularni asrab qolish va xavfsizligini ta’minlash uchun esa muhofaza zonasi tashkil qilish va mas’ullarga biriktirish kerak.
Fazliddin RO‘ZIBOYeV.
