O‘ramasda "Yoshlar mehnat guzari" ishga tushdi

Urgut tumani O‘ramas mahallasida "Yoshlar mehnat guzari" foydalanishga topshirildi.

Tadbirkor Ismoilxon Rahmatov tomonidan bunyod etilgan mazkur majmuaning qurilishiga 1,5 milliard so‘m mablag‘ sarflandi.

- Asosiy maqsadimiz mahalladagi ishsiz yoshlarning bandligini ta’minlash va ularni tadbirkorlikka qiziqtirish, - deydi I.Rahmatov. - "Yoshlar - kelajagimiz" davlat dasturi doirasida tashkil etilgan ushbu "Yoshlar mehnat guzari"da 6 ta savdo va maishiy xizmat ko‘rsatish nuqtasi va 1 ta tikuvchilik sexi ishga tushirilib, 25 nafar yigit-qizning bandligi ta’minlandi.

Ma’lumot o‘rnida: tumanda jami 7 ta “Yoshlar mehnat guzari” qurilishi rejalashtirilgan bo‘lib, ularning 2 tasi foydalanishga topshirildi. Qolganlarida qurilish ishlari davom etmoqda.

G‘ofirjon Bobobekov.