O‘zbekiston TIV: Turkiyada noqonuniy yurganlar aniqlanib, chiqarib yuborilmoqda
Hozirgi paytda Turkiyaning Istanbul shahrida huquqiy tartib va qonun ustuvorligini ta’minlash borasida zarur chora-tadbirlar amalga oshirilmoqda.
Shu maqsadda shaharda noqonuniy yurgan xorijiy fuqarolarni aniqlash va ularni mamlakatdan chiqarib yuborish borasida transport vositalarida, ish va yashash hamda jamoat joylarida muntazam tekshiruvlar olib borilmoqda.
Huquqni muhofaza qiluvchi idoralar tomonidan xorijiy fuqarolarga qo‘yilgan talablar va zarur me’yoriy hujjatlarni o‘rganish va vatandoshlarimiz huquqbuzar holatiga tushib qolishini oldini olish maqsadida O‘zbekistonning Istanbul shahridagi Bosh konsulxonasi shahar Xavfsizlik boshqarmasi va migratsiya xizmati rahbariyati bilan uchrashuvlar o‘tkazdi.
Turk mutaxassislarining ta’kidlashicha, aksar xorijiy fuqarolar Turkiyada yashash huquqini beruvchi (ikamet izni) va ishlashga ruxsat beruvchi (kalisma izni) hujjatlar farqini bilmaydi.
Qonunga muvofiq yashash huquqini beruvchi (ikamet izni) hujjatga ega chet el fuqarolari Turkiya hududida ishlashni istasalar, albatta, qo‘shimcha ishlashga ruxsat beruvchi (kalisma izni) hujjatlarga ham ega bo‘lishlari shart. Aks holda, ular qonunni buzgan hisoblanadi va ularga nisbatan choralar ko‘riladi.
Ma’lumki, 2018-yilning oktyabr oyidan boshlab Turkiya hukumati O‘zbekiston Respublikasi fuqarolariga Turkiya hududida 90 kun davomida vizasiz yurishga ruxsat berish to‘g‘risida qaror qabul qilgan. Bu muddat Turkiyada ishlash maqsadida kelgan xorijiy fuqarolarga yashash huquqi (ikamet izni) va ishlashga ruxsat beruvchi (kalisma izni) hujjatlarni rasmiylashtirish uchun yetarli muddat hisoblanadi.
Bundan tashqari, Turkiyaning xorijiy mamlakatlardagi diplomatik vakolatxonalarida turk ish beruvchilari bilan ikki tomonlama shartnomalar tuzish orqali Turkiyaga kelishidan oldin ham ishlash huquqini beruvchi (kalisma izni) hujjatlarini rasmiylashtirish imkoniyati mavjud. Bu esa, ishlashga kelmoqchi bo‘lgan fuqarolarning ishini sezilarli darajada osonlashtiradi.
Shu munosabat bilan Bosh konsulxona Turkiyada bo‘lib turgan yoki u yerga bormoqchi bo‘lgan O‘zbekiston fuqarolarini barcha kerakli hujjatlarni o‘z vaqtida rasmiylashtirishga va mamlakatda mavjud qonun-qoidalarga rioya qilishga chaqiradi.
Elchixona va Bosh konsulxona Turkiyada bo‘lib turgan fuqarolarimizning qonuniy huquqlarini himoya qilish maqsadida tegishli chora-tadbirlarni amalga oshirmoqda.
Zarur holatlarda hamyurtlarimiz O‘zbekistonning Anqara shahridagi Elchixonasi Konsullik bo‘limiga (0312) 441-17-46, e-mail: uzconsul.ankara@gmail.com, faks: +90 312 442 70 58) yoki Istanbul shahridagi Bosh Konsulxonasiga (+90 212 323-20-37, faks:+90 212 312 20 40, e-mail:uzbekconsul@yahoo.com) murojaat qilishlari mumkin.
O‘zbekistonning Anqara shahridagi Elchixonasi va Istanbul shahridagi Bosh konsulxonasi hamyurtlarimiz mazkur yo‘nalishda hamkorlik qilishiga umid qiladi hamda taklif va izohlar uchun oldindan minnatdorchilik bildiradi.
