Samarqandlik talaba ilk bor o‘tkazilgan "Yil talabasi" g‘oliblari safida

Oliy va o‘rta maxsus ta’lim vazirligi hamda vazirlik huzuridagi Ma’naviyat va ma’rifat markazi tomonidan ilk marotaba o‘tkazilgan “Yil talabasi” tanlovi g‘oliblari aniqlandi. Tanlov oliy ta’lim muassasalari talabalari o‘rtasida 3 bosqichda o‘tkazilib, unda jami 316 nafar yoshlar ishtirok etdi.

Poytaxtimizda “Yilning o‘z mutaxassisligi bo‘yicha eng bilimdon talabasi”,  “Yilning eng tashabbuskor talabasi”, “Yilning ixtirochi talabasi”, “Yilning sportchi talabasi”, “Yilning ijodkor talabasi” kabi nominatsiyalar bo‘yicha g‘oliblarni taqdirlash marosimi bo‘lib o‘tdi.

Samarqand davlat universiteti talabasi Hulkar Xudoyberdiyeva  “Yilning ijodkor talabasi” nominatsiyasi bo‘yicha 3-o‘ringa munosib ko‘rildi.

Tanlov nizomiga muvofiq ravishda har bir nominatsiya bo‘yicha 1-o‘rin sohiblari tanlov statuetkasi va eng kam ish haqining 10 barobari miqdorida, 2-o‘rin sohiblari eng kam ish haqining 8 barobari miqdorida, 3-o‘rin sohiblari eng kam ish haqining besh barobari miqdorida pul mukofoti va diplom bilan taqdirlandilar.