Samarqand OTMlariga o‘tgan yilgidan 22 ming nafardan ko‘p abituriyent hujjat topshirdi
Pandemiya sharoitidan kelib chiqib, joriy yil abituriyentlarning oliy ta’lim muassasalariga hujjatlarini ro‘yxatdan o‘tkazish Davlat test markazining onlayn ro‘yxatdan o‘tish tizimi, yagona interaktiv davlat xizmatlari portali va belgilangan hududlarda davlat xizmatlari markazlari orqali amalga oshirildi. Hozirda respublikamiz bo‘yicha 1 million 484 mingdan ortiq abituriyent onlayn ro‘yxatdan o‘tdi. Xususan, Samarqand viloyatidagi 9 ta oliy ta’lim muassasasiga jami 139874 nafar abituriyentdan arizalar tushdi. Bu o‘tgan yilgidan 22 mingdan ziyodni tashkil qiladi. Abituriyentlar tomonidan ro‘yxatdan o‘tishda birinchi OTM sifatida eng ko‘p tanlangan oliy ta’lim muassasalari ro‘yxatida Samarqand davlat universiteti 75 ming 325 nafar abituriyent hujjat topshirgan holda birinchi o‘rinda turibdi.
Test sinovlari o‘tkaziladigan binolar bir kishilik stol-stullar bilan ta’minlandi
2020-2021 o‘quv yili qabuli test sinovlarida foydalanish uchun Samarqand shahridagi Dahbed, Rudakiy va Ibn Sino ko‘chalari kesishmasida joylashgan SamDU akademik litseyi sport zali, sportning o‘yin turlari va yengil atletikaga ixtisoslashtirilgan bolalar va o‘smirlar sport majmuasining 4 ta sport zali hamda Samarqand pedagogika va xizmat ko‘rsatish kolleji sport zali tanlangan.
Bugungi kunda ushbu sport majmualarida karantin qoidalarini e’tiborga olgan holda (har bir abituriyentga 3 kvadrat metrdan kam bo‘lmagan) bir smenada, 71 ta guruhda 2130 nafar abituriyentga mo‘ljallangan bir kishilik stol-stullar, havoning mo‘’tadilligini ta’minlovchi katta sig‘imli konditsionerlar, sanitariya-gigiyena vositalari bilan ta’minlandi.
Test sinovlari o‘tkaziladigan har bir binoni tayyorlashda, hududga va binoga kirishda dezinfeksion tunnellar o‘rnatish, yorug‘likning tushishi, binoni shamollatish, abituriyentlarni tik tushgan quyosh nuridan himoyalash imkoniyatlari hisobga olindi.
Abituriyentlarning hududga kirishda tana harorati o‘lchanadi. Agar harorati 37 darajadan oshmasa, niqob va qo‘lqoplar bilan ta’minlangan holda binoga kirishga ruxsat beriladi. Har bir abituriyentga test sinovlari jarayonida 0,5 litr ichimlik suvi, ko‘k rangli sharikli ruchka beriladi.
Abituriyentlarning ba’zilari to‘lovni to‘liq amalga oshirmagan
Oliy ta’lim muassasalariga hujjat topshirayotganda to‘lov qilishi kerak bo‘lgan abituriyentlarning ayrimlari belgilangan to‘lovni to‘liq amalga oshirmadi. Bunday holatlar viloyatimizdagi oliy ta’lim muassasalariga hujjat topshirganlar ichida ham kuzatildi. Buning uchun Davlat test markazi tomonidan joriy yilning 21 iyul kuni soat 23:59 gacha qo‘shimcha ravishda to‘lovni amalga oshirish bo‘yicha muhlat berildi.
Soxta chet tili sertifikati bilan hujjat topshirgan abituriyentlar ham bo‘ldi
Qabul jarayonlarida, ya’ni 20 iyundan 20 iyulga qadar ro‘yxatdan o‘tgan abituriyentlarning 8660 ta hujjati chet tili sertifikati sifatida dasturga kiritildi. Bularning barchasi Davlat test markazi tomonidan tekshirildi va 8079 ta sertifikat o‘z tasdig‘ini topdi.
581 ta sertifikat esa talabga javob bermasligi aniqlandi. Jumladan, 200 ta sertifikatda tilni bilish darajasi belgilangan V2 darajadan past ekanligi, 117 ta sertifikat milliy yoki xalqaro imtihon tizimlaridan olinmaganligi (o‘quv markazlari tomonidan berilgan yoki xalqaro bo‘lmagan sertifikatlar), 69 ta sertifikatda amal qilish muddati tugaganligi, 7 ta holatda sertifikatlarning haqiqiy emasligi, 9 tasida sertifikat boshqa shaxsga tegishli ekanligi va boshqa holatlar aniqlangan.
Kirish test sinovlari qachon bo‘lishi ma’lum emas
Hozirda joriy yilning 1 avgustiga qadar karantin cheklovlari belgilangan. Karantin cheklovlari bekor qilinganidan yoki yumshatilganidan keyin davlat komissiyasi qarori bilan kirish test sinovlarini o‘tkazish rejalashtirilgan.
Vohid SIRLIBOYeV,
Davlat test markazi viloyat bo‘limi boshlig‘i vazifasini bajaruvchi.
