Shaxmat: Yetakchilar safida hamyurtimiz ham bor

Toshkentdagi Xalqaro shaxmat akademiyasida o‘zbekistonlik birinchi grossmeyster Georgiy Agzamov xotirasiga bag‘ishlangan XIV an’anaviy xalqaro turniri davom etmoqda.

Dunyoning 12 davlatidan 150 nafar shaxmatchi qatnashayotgan musobaqaning «A» guruhida hamyurtimiz Nodir Abdusattorov birinchi o‘rinni egallab turibdi. U 3-turda belaruslik iqtidorli shaxmatchi K.Spivakni mag‘lub etdi. Yosh shaxmatchimiz dastlabki turlarda sobiq shaxmat chempioni R.Qosimjonovdan ustun kelgan edi.

Shuningdek, armanistonlik Sh.Sargisyan ham mag‘lubiyatga uchragani yo‘q. U ham 3-turda ozarbayjonlik xalqaro grossmeyster M.Muhammad ustidan g‘alaba qozongan. Yana bir armanistonlik T.Arutunyan hamda Eron vakili A.Golamilar ham 3 o‘yindan 3 ochko jamg‘arishgan.

Umidli shaxmatchilarimiz H.Bekmurodov, N.Yoqubboyev hamda B.Sattorovlar 2,5 ochko to‘plashgan.

Musobaqa davom etmoqda.