Taniqli ijodkorlar o‘qituvchilar bilan uchrashdi

Avval xabar berganimizdek, shu kunlarda viloyatimizda poytaxtdan kelgan shoir va yozuvchilar ishtirokida ijodiy uchrashuvlar o‘tkazilmoqda. Bugun ular viloyat pedagoglarini yangi metodikalarga o‘rgatish milliy markazi tinglovchilari bilan uchrashdi.

Tadbirda viloyat hokimi Erkinjon Turdimov ishtirok etdi.

- Bugun el sevgan ijodkorlar Erkin A’zam, Usmon Azim va Mamatqul Hazratqulovning samarqandlik yoshlarni tarbiyalayotgan o‘qituvchilar bilan ijodiy uchrashuv o‘tkazayotganligi uchun barchamiz minnatdormiz, - dedi E.Turdimov. - Chunki taniqli insonlar bilan bo‘ladigan har bir muloqot yoshlarda kitobxonlik madaniyatini oshiradi.

Uchrashuvda Urgutda tug‘ilib o‘sgan va poytaxtda turli mas’ul vazifalarda ishlagan taniqli jurnalist, yozuvchi Mamatqul Hazratqulovning ijodi, keyingi yillarda chop etilgan kitoblari haqida so‘z yuritildi. Usmon Azim tomonidan o‘qilgan she’rlar, Erkin A’zam asarlaridan keltirilgan iqtiboslar ishtirokchilarga ko‘tarinkilik bag‘ishladi.