Toshkentda bir kechada 5 ta yong‘in sodir bo‘ldi
Toshkent shahrida bir kunda 5 ta yong‘in holati qayd etilgan bo‘lib, shulardan 3 tasi qurigan o‘simlik va chiqindilarni yonishi bilan bog‘liq bo‘lgan yong‘inlarni tashkil etmoqda.
Jumladan, bugun, 17 iyul kuni soat 07:20 da, Sergeli tumani, Yo‘ldosh 9-dahasi 7-uy 12-xonadonda uy jihozlari 15 kv.m maydonda yongan. Yong‘indan xonadonning 25 kv.m maydoni saqlab qolingan. Yong‘in o‘chirish jangovar bo‘linmalari chaqirilgan manzilga soat 07:21 da yetib borgan va ko‘rilgan tezkor chora va harakatlar natijasida yong‘in soat 07:36 da bartaraf etilgan.
Yong‘in elektr simlarni qisqa tutashuvi oqibatida sodir bo‘lgan deb, taxmin qilinmoqda. Yong‘indan keltirilgan moddiy zarar miqdori aniqlanmoqda. Yong‘in joyiga 4 ta yong‘in o‘chirish texnikasi jalb qilingan.
Shu munosabat bilan, Toshkent shahar Yong‘in xavfsizligi boshqarmasi iqtisodiyot tarmoqlari va ijtimoiy soha ob’yekt rahbar hamda xodimlarini, shuningdek fuqarolarimizni yong‘in xavfsizligi qoidalariga qat’iy rioya etishlarini so‘rab qoladi.
