Yangi kitoblar: “Samarqand mustaqillik yillarida”
Yaqinda “SAHHOF” nashriyotida shu nomdagi xronologik ko‘rsatkich chop etildi.
O‘tgan 30 yilning har bir kuni O‘zbekiston, shuningdek Samarqand viloyati, mard va fidoyi xalqimiz hayotida o‘ziga xos iz qoldirdi.
Jumladan, ushbu to‘plamda Vatanimiz mustaqillikka erishgandan shu bugungacha viloyatimizda sodir bo‘lgan muhim voqea-hodisalar, yangiliklar va ko‘rsatkichlar haqida “Zarafshon” gazetasida chop etilgan xabar va maqolalar asosida o‘ziga xos ma’lumotnoma tayyorlandi.
Shuningdek, risolada viloyat hayotidagi ijtimoiy-iqtisodiy o‘zgarishlar, ko‘rsatkichlar va raqamlar o‘tgan yillarga taqqoslangan.
Risola o‘ttiz yilda Samarqand viloyatida amalga oshirilgan islohotlar, o‘zgarishlar va yangiliklar bilan tanishishni istagan, taqqoslama iqtisodiy-ijtimoiy ko‘rsatkichlarni tahlil qilishga qiziqqan kitobxonlar uchun mo‘ljallangan.
***
“Fazilat opaning fazilatlari”
Ijodkor Muhammad Murod Sulton qalamiga mansub “O‘zbekiston dengizi” sohillarida” nomli kitobi chop etildi.
Ushbu kitobdan Kattaqo‘rg‘on suv ombori qurilishi, suv hovuzidan foydalanish boshqarmasi va suv hovuzi shaharchasining tashkil topishi tarixi haqida qiziqarli ma’lumotlar o‘rin olgan. Kitob kirill va lotin alifbolarida berilgan.
Unda ushbu suv hovuzining 80 yillik tarixi o‘rin olgan. Bunda xalqning suv omborini qurishi, uning qurilishida bosh-qosh bo‘lgan insonlar va turli muhim tarixiy hodisalar o‘rin olgan. Qolaversa, bugun dunyoda eng katta muammoga aylangan ichimlik suvi, qurg‘oqchilik haqida ham so‘z borgan.
Sermahsul ijodkorning iste’dodli shoira Aziza Boymurodova bilan hammualliflikda shoira va jurnalist, “Do‘stlik” ordeni sohibi Fazilat Abdullayevaning umr yo‘li va ijodiy portretlariga chizgilari aks etgan “Fazilat opaning fazilatlari” kitobi ham nashrdan chiqdi.
Kitobda shoiraning ibratli hayot maktabi, ijodiy mahorati haqida so‘z boradi. Shuningdek, unda A.Boymurodovaning turli gazetalarda chop etilgan maqolalari ham o‘rin olgan.
***
“Miyonqolning fidoyi insonlari”
Yaqinda taniqli ijodkorlar Gulchehra Usmonova hamda Muqaddam Hayitova hammuallifligida shu nomdagi kitob nashrdan chiqdi.
Ushbu kitobda Ishtixonning mehnatsevar, fidoyi farzandlari hayotidan ibratli lavhalar, farzandlari, zamondoshlari va shogirdlarining ular haqidagi xotiralari o‘rin olgan.
Ishtixon azaldan paxta va g‘alla yetishtirish ustalari, bog‘bon va polizchilar diyori sanalgan. Ayniqsa, g‘alla yetishtirish borasida respublikada o‘ziga xos tajribaga ega bo‘lgan tuman. Bu hududda ko‘plab dongdor agronomlar yetishib chiqqan. “Miyonqolning fidoyi insonlari”da yaqin o‘tmishda yashab o‘tgan ana shunday usta dehqonlar, saxovatli insonlar, ishlab chiqarishning mohir tashkilotchilari haqida hikoya qilinadi.
Unda Ikkinchi jahon urushi qatnashchisi, xalq orasida Lukash botir nomi bilan tanilgan Luqmon O‘roqov, dunyo kezgan agronom Zoyir Ziyotov, qishloq xo‘jaligi fidoyisi Jo‘raqul Karimov kabi insonlar haqidagi ibratli, hayotiy voqealar o‘quvchida katta taassurot qoldiradi. Bu kabi og‘ir yillarda, qiyin sharoitlarda o‘zining fidokorona mehnati bilan el koriga yaragan insonlar ro‘yxatini ancha davom ettirish mumkin. Kitobni varaqlar ekansiz ular nafaqat Miyonqolda, balki butun mamlakatimizda o‘z o‘rniga ega bo‘lgan millat fidoyilari ekaniga amin bo‘lasiz.
***
“Hayot saboqlari”
Qishloq xo‘jalik fanlari doktori, ijodkor Nazar Botirning “Hayot saboqlari” kitobida mallifning mazmunli hayot yo‘lidan saralab olingan ibratli voqealar va hikoyalar jamlangan.
Mazkur risolada muallif bolaligining beg‘ubor damlari, maktab bag‘ridagi shodon kunlari, oliy dargoh quchog‘ida bilim sarchashmalaridan bahramand bo‘lishi, so‘ngra oliygohda faoliyat ko‘rsatishdek baxtga muyassar bo‘lganligi, viloyat miqyosidagi ish faoliyatini ta’lim-tarbiya masalalari bilan uzviy olib borish asnosidagi voqealar zanjiri bayon qilingan.
Quvonarlisi shundaki, ular quruq dalil yoki chizmalar emas, balki badiiy bo‘yoqlar orqali lo‘nda va sodda shaklda bayon etilgan. Uni mutolaa qilgan har bir o‘quvchida o‘ziga xos fikr uyg‘otadi.
Risola keng kitobxonlar ommasiga mo‘ljallangan.
Sulaymon Mardiyev,
Fazliddin Ro‘ziboyev.
