Yaponiyada surunkali yoqqan qor tufayli 60 dan ortiq inson halok bo‘ldi
Yaponiyaning Xonsyu va Xokkaydo orollari shimoliy hududlarida dekabr oyidan buyon qalin qor yog‘moqda. Oqibatda transport harakatida uzilishlar muntazam sodir bo‘lyapti, kommunal xo‘jaligi faoliyati izdan chiqqan. Shu bois mamlakatning shimoliy hududlarida qorni tozalash uchun resurslar yetishmayapti.
Davlat yerlari, infratuzilmalar, transport va turizm vaziri Kadzuyosi Akabaning aytishicha, uylarini qordan tozalash chog‘ida 60 dan ortiq inson hayotdan ko‘z yumgan.
«Davlat qorni xavfsiz tozalash uchun zarur mablag‘ni zudlik bilan hisoblab chiqib, yordam ko‘rsatadi, — degan u. — Biz tozalash ishlarida halok bo‘lganlar soni rekord darajaga yetganidan chuqur qayg‘udamiz».
Vazirning so‘zlariga ko‘ra, bu 2017-2018 yillarda qayd etilgan ko‘rsatkichdan ham ko‘pdir.
Qordan qutulaman deb dunyodan ko‘z yumganlarning asosiy qismi yoshi katta insonlardir. Ularning ko‘pchiligi uylari tomlarini tozalashda yiqilib yoki qor uyumi tagida qolib ketib, halok bo‘lgan. Hukumat mahalliy boshqaruv organlariga ajratilayotgan resurslarni birinchi navbatda aholiga yordam berish uchun sarflash bo‘yicha topshiriq bergan.
