Yong‘indan so‘ng Bog‘izog‘ondagi shikastlangan yirik transformator  almashtirilmoqda

Kecha, 11 dekabr kuni soat 20:20 atrofida Toyloq tumanidagi “Bog‘izog‘on” podstansiyasidagi transformatorda yuklamalarning ortishi oqibatida yong‘in yuzaga kelgandi.

Kechasi mazkur yong‘in to‘liq bartaraf etildi. “Hududiy elektr tarmoqlari” AJ Samarqand hududiy filiali xabariga ko‘ra,  hozirda shikastlangan 16000 kilovolt (kV) transformator o‘rniga 20000 kilovolt (kV) transformator keltirilib, o‘rnatish ishlari olib borilmoqda.

“Ayni damda mazkur transformator punktidan elektr energiyasi bilan ta’minlanuvchi Jumabozor (Saribozor, Xo‘jaqishloq, Jalolobod), Galabotir, Elipok, Taraqqiyot, Zarafshon, Yastepa, Eski Juma, Qo‘shchinor mahallalarida, Urgut tumanidagi ayrim mahallalarda elektr ta’minotida uzilishlar kuzatilmoqda. Keltirilgan noqulayliklar uchun iste’molchilardan uzr so‘raymiz”, deyiladi Samarqand HET xabarida.