Sa’dinovlar ishi bo‘yicha jurnalistlar faollik ko‘rsatdi

Bugun ijtimoiy tarmoqlarda Samarqand shahridagi 64-maxsus maktab-internat sobiq direktori Shuhrat Sa’dinov va boshqalarning sud majlisida ozodlikka chiqarilgani haqidagi xabarlar ko‘pchilikni befarq qoldirmadi.
O‘tgan yil iyul oyida mazkur maktab-internatda sodir bo‘lgan voqealar ortidan jinoyat ishi ochilib, qamoqqa olingan Sh.Sa’dinov va uning xodimlari oxir-oqibat sud hukmi bilan ozodlikdan mahrum etilgan edi.
Sudning mazkur hukmi bo‘yicha berilgan apellyasiya shikoyati keng jamoatchilikning, xususan, jurnalistlarning ham e’tiborida bo‘ldi. Ochig‘i, voqea rivoji bunday bo‘lishiga ishonmagandik. Chunki bunday tajriba kamdan-kam uchraydi. Qolaversa, bo‘lib o‘tgan voqea uchun Sh.Sa’dinovga shu qadar katta ijtimoiy bosim uyushtirildiki, eng yaqin odamlari ham tuhmat bilan jinoyatni farqlolmay qolishdi.
Albatta, murakkab vaziyatda masalani puxta o‘rgangan va nohaqlik bilan qat’iy pozitsiyada turib kurashgan hamkasblarimizga rahmat, deymiz.
Bizningcha, bu hodisa ikki tomonlama ham foydali bo‘ldi. Negaki, huquq-tartibot idoralari haligacha biror ishni ko‘rishda bir-biridan xavfsirab turishadi. Jazoni yengillatish mumkin bo‘lgan holatlarda ham «Anavilar bir narsa olgansan deyishadi», degan fikrda jazoni maksimal tayinlashadi. Agar shu voqea sabab tergovchi va sudyalar tegishli chorasini olishsa, soha xodimlari har qanday holatda o‘zini himoya qilishni o‘rganadi.
Ikkinchidan, bu voqea odamlarda OAVga, jamoatchilik kuchiga nisbatan ishonch uyg‘otadi, deb hisoblaymiz.