Davlat xizmatchilari malaka oshiryaptimi?
Bugungi kunda barcha sohalarda turli o‘zgarishlar, yangi tushuncha va atamalar paydo bo‘lmoqda. Shu bois har bir davlat xizmatchisining muayyan vaqt oralig‘ida malaka oshirishini, yangi bilim va ko‘nikmalarni o‘rganishini davrning o‘zi taqozo qilmoqda.
Tahlillarga ko‘ra, 2018 yilda viloyat, shahar hamda tuman hokimliklari bo‘yicha 426 nafar xodimlardan 6 nafari (1,4 foizi) malaka oshirgan, 2019 yilda 447 nafar xodimdan 49 nafari (11 foizi), joriy yil avgust oyiga qadar 443 nafar xodimdan 32 nafari (7,2 foizi) malaka oshirgan.
Umuman, 2019-2020 yillarda viloyat hokimligidan 10 nafar rahbar xodim, tuman va shahar hokimliklaridan 71 nafar rahbar xodim malaka oshirgan. Shu davrda viloyat hamda tuman (shahar) hokim o‘rinbosarlari 52 marta, hokimliklardagi boshqa rahbar xodimlar 10 marta malaka oshirgan.
Viloyatda bor-yo‘g‘i ikki nafar boshqarma xodimlari Xitoy Xalq Respublikasi hamda Yaponiya davlatida malaka oshirish kurslarini yakunlagan. Boshqa tashkilotlar xodimlari xorijiy mamlakatlarda malaka oshirish kurslarida o‘qitilmagan.
Vaholanki, rivojlangan davlatlar tajribasi boshqaruv organlarida faoliyat yuritayotgan xizmatchilarni uzluksiz rivojlantirish, raqobatga javob beradigan, mustaqil va tezkor qarorlar qabul qiladigan kadrlarni tayyorlash va ularning malakasini oshirish zarurligini ko‘rsatmoqda.
Masalan, Germaniya Federal davlat boshqaruv akademiyasi o‘quv jarayonida tinglovchilar o‘z nazariy bilimlarini amaliyotda olgan ko‘nikmalari bilan mustahkamlab boradi.
Malaka oshirish turlari ikki xil toifaga bo‘linadi. Birinchisi, davlat xizmatchilari o‘rtasida tegishli bilim darajasini ta’minlashga, ikkinchisi, ularning o‘zgarishga moslashishiga qaratilgan bo‘ladi.
Fransiyada davlat fuqarolik xizmatchilarini qayta tayyorlash, malakasini oshirish bo‘yicha 70 dan ortiq ta’lim muassalari mavjud. Ularda davlat fuqarolik xizmatchilarining faqat boshqaruv sohasida emas, balki o‘z mutaxassiliklari bo‘yicha ham malaka oshirish imkoniyati bor.
G‘arbiy Yevropa mamlakatlarida Lifelong Learning - uzluksiz ta’lim, umr bo‘yi o‘qish tizimi joriy etilgan. Ushbu tizim malaka oshirishga yangicha yondashuvlardan biri bo‘lib, u uzluksiz yangi bilim va ko‘nikmalarni egallashdan iborat.
Viloyatimizdagi 9 ta malaka oshirish institutlari barcha mahalliy davlat organlari va tashkilotlarda faoliyat yuritayotgan xizmatchilarni qamrab olish uchun yetarli emas. Bu esa bugungi rivojlangan davlatlar malaka oshirish institutlari ta’lim uslublarini o‘rganish, tajribasini qo‘llash zarurligini ko‘rsatmoqda.
Barno YuLDOShEVA,
Davlat xizmatini rivojlantirish agentligi viloyat filiali inspektori.
