Dunyodagi g‘ayrioddiy yomg‘irlar
Sayyoramizda qo‘rqinchli yoki yeyish va g‘amlab qo‘yish mumkin bo‘lgan g‘ayrioddiy yomg‘irlar ham yog‘adi.
Qurbaqa yomg‘iri
2005 yilda Serbiyadagi kichik bir qishloq aholisi osmonni qorong‘i, dahshatli bulut qoplagani va juda kuchli yomg‘ir bo‘lishini muhokama qilishdi.
Sovuq shamol esdi, osmon ochildi va tepadan haqiqiy qurbaqalar yog‘ila boshladi. Yomg‘ir qisqa, ammo kuchli bo‘ldi. O‘n daqiqada yerga bir necha ming qurbaqa tushdi. Avvaliga qurbaqalar shunchaki atrofga qarashdi, keyin qurillab, to‘rt tomonga sakrab qochishdi.
Hodisani o‘rgangan serb olimlarining bunday yomg‘ir juda amaliy tushuntirishga ega ekanligiga ishonchi komil bo‘ldi. Qaysidir botqoqlik yaqinida kuchli uyurmali shamol sodir bo‘lgan va qurbaqalar so‘rib chiqarilib, shu yerga olib kelib sochilgan.
Meva-sabzavot yomg‘iri
2011 yilda Angliyadagi Koventri shaharchasi aholisi mevali yomg‘irdan zavqlanishdi. Yigirma daqiqa davomida osmondan olma, nok, sabzi, karam va sabzi yog‘ildi.
Ba’zi odamlar yog‘ingarchilikning umumiy miqdori taxminan 250 kilogramm deb hisoblangan saxiy sovg‘alarni yig‘ib olib, sumkalarni to‘ldirib olishdi. Bunday yomg‘ir qanday sodir bo‘lishi mumkinligi tekshiruvi boshlanganida, olimlar qurbaqa yomg‘iri bilan bir xil gipotezani ilgari surdilar: barchasiga bo‘ronli shamol aybdor.
Baliq yomg‘iri
Bunga ishonish qiyin, lekin har yili may va iyul oylarining o‘rtalarida Gondurasda baliq yomg‘iri hodisasi bor. Ba’zan yiliga ikki marta sodir bo‘ladigan yog‘ingarchilik 300 yildan buyon sodir bo‘ladi. Manzil ham har doim bir xil: Yoro shahri.
Mahalliy aholining so‘zlariga ko‘ra, yomg‘ir hamisha bir xil boshlanadi. Avvaliga o‘sha kuni kechqurun soat beshlarda shahar ustini qora bulut qoplaydi, kuchli momaqaldiroq gumburlaydi, har joyda chaqmoq chaqqadi. Keyin sardina baliqlari yomg‘ir bo‘lib yerga tushadi.
Shahar aholisi chelak va sumkalar bilan tayyor turishadi. Yomg‘ir tugashi bilan ular ko‘chaga yugurib chiqib, baliq zaxirasini g‘amlaydi. Shundan so‘ng, bir necha oy davomida shahar xonadonlarida faqat qovurilgan, bug‘langan, qaynatilgan baliq pishiriladi yoki baliqlar keyingi yomg‘irgacha tuzlab, dudlab qo‘yiladi.
Qadimiy tangalar yomg‘iri
1940 yilda Rossiyaning Nijniy Novgorod viloyatidagi Meshcheri qishlog‘i aholisi dalalarida tinchgina mehnat qilishardi. To‘satdan osmondan ularning ustiga oddiy yomg‘ir emas, XVI asrga oid kumush va oltin tangalar yog‘ila boshladi. Hammasi bo‘lib, dehqonlar turli qiymatdagi 1000 ga yaqin tangalarni terib olishdi.
Keyinchalik ma’lum bo‘lishicha, bir paytlar bir qaroqchi shu qishloq yaqinida katta xazinani ko‘mib qo‘ygan. Uch asr o‘tib, kuchli momaqaldiroqli yomg‘ir paytida tuproq yuvilib ketgan va xazina yuzaga chiqqan.
Yaxshi kunlarning birida dovulli shamol ko‘tarilib, tangalarni mahalliy aholi ishlayotgan Meshcheri yaqinidagi dalaga olib keldi.
Bahora Muhammadiyeva tayyorladi.
