Erta nikoh holatlari asosan Samarqand viloyatida qayd etilgan
Bu haqda AOKAda o‘tkazilgan brifingda «Mahalla va oila» ilmiy-tadqiqot instituti direktor o‘rinbosari Hamid Abdurahmonov ma’lum qildi.
Uning ta’kidlashicha, Davlat statistika qo‘mitasi ma’lumotlari ko‘ra, 2020 yilda 88 ta erta nikoh holati qayd etilgan. Tahlillar o‘tgan yilga nisbatan erta nikohlar sonining 97,0 foizga kamayganini ko‘rsatdi.
Buning asosiy sabablaridan biri 2019 yil 1 sentyabrdan erkaklar va ayollar uchun nikoh yoshi tenglashtirilgani, Fuqarolik holati dalolatnomalarini qayd qilish bo‘limlari tomonidan faqat tuman, shahar hokimi tomonidan nikoh yoshini 1 yilga kamaytirishga ruxsat berilgan nikohlar qayd etilishi bilan izohlanadi. Lekin amaliyot aksariyat holatlarda erta nikoh yashirin tusga egaligini unutmasligimiz kerak.
Tahlillar erta nikoh holatlari asosan Urgut, Samarqand, Past Darg‘om, Kattaqo‘rg‘on, Denov, Shahrixon tumanlari, Namangan, Samarqand va Andijon shaharlarida ko‘p qayd etilganini ko‘rsatdi.
2020 yilda 1044 ta erta tug‘ruq holati qayd etilgan bo‘lib, 2019 yilga nisbatan 12,7 foizga kamaygan. Ammo hududlar kesimida tahlil qilinganda, erta tug‘ruqlarning qariyb yarmi, ya’ni 43,1 foizi Samarqand va Qashqadaryo viloyatlari ulushiga to‘g‘ri keladi.
