Korrupsiyaga qarshi qanday kurashamiz?

Samarqand shahridagi yoshlar markazida "Korrupsiyaga qarshi birgalikda kurashamiz!" mavzusidagi insholar tanlovining viloyat bosqichi g‘oliblarini taqdirlash marosimi o‘tkazildi.

9 dekabr - Xalqaro korrupsiyaga qarshi kurashish kuni oldidan o‘tkazilgan mazkur tanlov o‘rta maxsus va xalq ta’limi muassasalari o‘quvchilari hamda oliy o‘quv yurtlari talabalari o‘rtasida tashkil etildi.
Tanlovning birinchi bosqichida 750 nafardan ortiq nomzod qatnashib, 79 nafar ishtirokchi g‘olib deb topildi va tanlovning viloyat bosqichida ishtirok etdi.

Natijaga ko‘ra, o‘quvchilar o‘rtasida o‘tkazilgan tanlovda birinchi o‘rinni Kattaqo‘rg‘on shahri 17-IDUM 11-sinf o‘quvchisi Ruxshona Bahodirova qo‘lga kiritdi. Ikkinchi o‘rinni nurobodlik Shahzoda O‘rolova, uchinchi o‘rinni esa yana bir kattaqo‘rg‘onlik o‘quvchi Nargiza Hasanova egalladi.

Talabalar orasida birinchilik Samarqand davlat universiteti Kattaqo‘rg‘on filiali pedagogika va tillarni o‘qitish fakulteti 2-bosqich talabasi Shalola O‘rozovaga nasib etdi. Keyingi o‘rinlarni Toshkent davlat agrar universiteti Samarqand filiali talabasi Odinaxon Turg‘unova, O‘zbekiston – Finlandiya pedagogika instituti talabasi Mehrangiz Islomova qo‘lga kiritdi.