Namanganda koronavirus bilan kasallanganlar soni 65 taga yetdi. Ikki oylik chaqaloqqa ham yuqtirilgan

Kecha, 12 aprel kuni viloyat hokimi Xayrullo Bozorov koronavirus bilan bog‘liq vaziyat bo‘yicha Namangan viloyati aholisiga murojaat qildi.

“Viloyatimizda bugungi kunda koronavirus bilan kasallanganlar soni 65 taga yetib, koronavirus Namanganda ilk aniqlangan sana – 25 martdan buyon bu raqam 32 barobarga oshdi.

Koronavirus infeksiyasi yuqtirib olganlarning 22 nafari erkaklar, 43 nafari ayollarni tashkil etsa, 11 nafari yoshlar (18 yoshgacha), 7 nafari 60 yoshdan o‘tganlarni tashkil etadi.

Virus yoshu qarini tanlamayapti, afsuski, ikki oylik chaqaloqni ham ayab o‘tmadi. 2020 yil 9 yanvarda tug‘ilgan Muhammad Sirojiddinov ham ushbu kasallikni buvisidan yuqtirib olgan. Bu chaqaloqni davolash bo‘yicha shifokorlarimiz barcha choralarni ko‘rmoqda”.