O‘zini o‘zi band qilish: qulay, qonuniy va xavfsiz
2020 yil 1 iyuldan boshlab O‘zbekistonda fuqarolarning o‘zini o‘zi band qilish bo‘yicha faoliyat turlarining 67 tagacha kengaytirilishi asosida ro‘yxatga olish tartibi joriy etiladi.
Eslatib o‘tamiz, joriy yil 8 iyun kuni O‘zbekiston Prezidentining “Tadbirkorlik faoliyati va o‘zini o‘zi band qilishni davlat tomonidan tartibga solishni soddalashtirish chora-tadbirlari to‘g‘risida”gi qarori qabul qilindi.
O‘zini o‘zi band qilganlar – bu xizmatlar ko‘rsatishda mustaqil ravishda shaxsiy mehnati bilan ishtirok etadigan, mehnat daromadini olish uchun ish olib boruvchi shaxslar. Bunda ular yakka tartibdagi tadbirkor sifatida ro‘yxatga olinmaydi va yollanma xodimlar mehnatidan foydalanmaydi.
Faoliyat turlari ushbu havolada keltirilgan.
O‘zini o‘zi band qilgan fuqaro sifatida ro‘yxatdan o‘tishni xohlovchilar buni “Soliq” mobil ilovasidan foydalangan holda yoki jismoniy shaxslarning shaxsiy kabineti orqali masofadan turib, bepul amalga oshirishi mumkin.
“Soliq” mobil ilovasi orqali ro‘yxatdan o‘tish uchun PINFL (JShShIR)ni kiritish talab etiladi.
PINFL –
yoki ERI (elektron raqamli imzo) va shaxsiy telefon raqami.
Jismoniy shaxs sifatida shaxsiy ma’lumotlar kiritilganidan so‘ng, faoliyat turini tanlash lozim. Biryo‘la bir nechta faoliyat turlarini tanlashning ham iloji bor. Faoliyat ko‘rsatish joyi – viloyat va tuman (shahar), albatta ko‘rsatilishi kerak.
Ro‘yxatga olish natijalariga ko‘ra, o‘zini o‘zi band qilganlik to‘g‘risidagi ma’lumotlar Soliq to‘lovchilarning yagona reyestriga kiritiladi va foydalanuvchiga ro‘yxatga olinganini tasdiqlovchi matritsali shtrix kod (QR kod) yuboriladi. QR kodli ma’lumotnomani xohishga ko‘ra chop ettirish mumkin.
Yaqin kunlarda yangi funksiya ishga tushiriladi – ro‘yxatdan o‘tishda selfi qilib (o‘zini suratga olib) uni mobil ilova orqali yuborish talab etiladi. Bu soliq organlarida saqlanadigan shaxsiy ma’lumotlarni himoya qilish uchun zarur. Fotosurat DPM (Davlat personallashtirish markazi)ning biometrik ma’lumotlari bilan taqqoslanadi va mos kelgan taqdirda, murojaatchining shaxsi tasdiqlangan deb hisoblanadi.
O‘zini o‘zi band qiladiganlar rasman ro‘yxatdan o‘tgandan so‘ng, qonuniy ravishda ishlashlari, shuningdek, mijozlardan qabul qilingan barcha buyurtmalarni rasmiylashtirish va saqlashi mumkin. Ma’lumotlar bazasida har bir buyurtma uchun ishlarning soni va qiymati, shuningdek mijozning telefon raqami to‘g‘risidagi ma’lumotlar saqlanadi. Buyurtma asosida chek shakllantirish va uni mijozga yuborish imkoniyati mavjud.
O‘zini o‘zi band qilganlar har oy yakuni bo‘yicha buyurtma asosida olingan daromadlari va xarajatlari hisobini yuritishi va ijtimoiy solig‘ini hisoblashi mumkin. Istalgan vaqt oralig‘i uchun daromadlar va xarajatlar haqidagi to‘liq ma’lumotlar birgina tugmani bosish orqali shakllantiriladi.
PQ-4742-sonli qarorning 3 bandiga asosan o‘zini o‘zi band qilgan shaxslar 2020 yil uchun ijtimoiy soliqni bazaviy hisoblash miqdorining kamida 50 foizi hajmida to‘laydi. Ushbu summa to‘liqligicha byudjetdan tashqari Pensiya jamg‘armasiga yo‘naltiriladi. Soliqlarni to‘lash masofadan turib, mobil ilova yoki har qanday elektron to‘lov tizimi orqali amalga oshiriladi. Bu jismoniy shaxslar uchun soliq to‘lash jarayoniga o‘xshaydi. Endi soliq majburiyatlarini soliq organlariga tashrif buyurmasdan bajarish mumkin.
Hozirgi vaqtda o‘zini o‘zi band qilgan fuqarolar uchun xizmat turlari va imkoniyatlar kengaymoqda. Bir qator muhim funksiyalar va qulayliklar ishlab chiqilmoqda. Misol uchun, xizmatlarni mashhur elektron maydonchalarda reklama qilish, ko‘rsatilgan xizmat uchun to‘lovlarni qabul qilish (P2P) imkoniyatlari yaratilmoqda. Mijozlar bazasi bilan aloqa o‘rnatish iset’molchilar tomonidan berilgan baho va fikr mulohazalarni ko‘rish imkonini beradi. Mobil ilovaning Android versiyasi bilan bir qatorda iOS versiyasi ham yaratilmoqda.
DSQ Matbuot xizmati
