Qoraqalpog‘istonda suv quvurini qazish paytida 4 kishini tuproq bosib qolgan, 3 kishi vafot etgan

Kecha, 9 iyun kuni soat 05:30 larda fuqaro S.U. (1990 yilda tug‘ilgan) voyaga yetmaganlar S.K. (2006 yilda tug‘ilgan), S.M. (2007 yilda tug‘ilgan) va D.M. (2004 yilda tug‘ilgan)lar Qo‘ng‘irot tumani Suo‘enli OFY hududining cho‘l qumlik qismida, yer ostida bo‘lgan suv quvurini qazishgan, deb xabar berdi Qoraqalpog‘iston Respublikasi prokuraturasi.

Qazish paytida tuproq o‘pirilib bosib qolishi oqibatida fuqaro S.U., S.K. va S.M. voqea joyida vafot etgan. Voyaga yetmagan D.M. tuproq ostidan chiqarib olinib, Qo‘ng‘irot tumani tibbiyot birlashmasiga yotqizilgan.

Holat yuzasidan Qo‘ng‘irot tumani prokuraturasi tomonidan tergovga qadar tekshirish harakatlari olib borilmoqda.

Natijasi bo‘yicha qo‘shimcha ma’lumot beriladi, deyiladi xabarda.