Samarqand shahrida tashkil etilgan qo‘l jangi bo‘yicha xalqaro turnir yakunlandi
Qo‘l jangining professional R-1 yo‘nalishi bo‘yicha ilk marta o‘tkazilgan ushbu nufuzli xalqaro turnirda 6 ta jang o‘tkazildi.
Reyting jangida dastlab qirg‘izistonlik Bekulan Sayibjan ulu hamyurtimiz Firdavs Rahimovni yengdi.
So‘ngra ringda yana bir hamyurtimiz Shahnoza Rahmonova rossiyalik Anna Yemelyanenko bilan bellashdi. Bu jangda Shahnoza Yemelyanenkoga imkon qoldirmadi.
Shuningdek, janglarda o‘zbekistonlik Abdurahmon Fozilov tojikistonlik Imomali Safaralini, Jamshid Rahmonaliyev turkmanistonlik Ruslan Memedhasanovni, Mirshod Ja’farov amerikalik Tayson Marsel Garnerni yengdi.
Turnirning asosiy jangi hamyurtimiz, qo‘l jangi bo‘yicha jahon chempioni Jahongir Jumayev va rossiyalik Magomed Ibragimov o‘rtasida kechdi. Unda Jahongir raqibini nokautga uchratdi.
Asosiy jang g‘olibi 2000, ikkinchi o‘rinni egallagan sportchi 1000 AQSh dollariga ega bo‘ldi.
Reyting janglari g‘oliblariga 1000, ikkinchi o‘rin sohiblariga 500 dollar berildi.
