Samarqandda to‘rtta notariusning faoliyati “a’lo” baholangan

Adliya vazirligi tomonidan 2019 yilning 2-yarmida notariuslarning ish faoliyati sifati ushbu jarayonga uchinchi shaxslar aralashuvini istisno etuvchi avtomatlashtirilgan elektron dastur orqali baholangan.

Unga ko‘ra, Samarqand viloyatidagi to‘rtta, xususan, Kattaqo‘rg‘on tumanidagi 1-notarial idora notariusi Shuhrat Rahimov, Urgut tumanidagi 2-notarial idora notariusi Furqatjon Xursandov, Samarqand tumanidagi 1-notarial idora notariusi Erkinjon Axtamov, Payariq tumanidagi 1-notarial idora notariusi Alisher Tashtemirovlarning faoliyati “a’lo”, deb baholangan.

Shuningdek, shahar va tumanlardagi 40 nafar notariuslar faoliyati “yaxshi”, deb baholangan.

Ayni paytda viloyatdagi 3 nafar notariusning faoliyati “qoniqarsiz”, deb topilgan.

Adliya vazirligi tomonidan ish faoliyati «a’lo» deb topilgan notariuslarni rag‘batlantirib borish hamda «talabga javob bermaydi» deb baholangan notariuslar faoliyatini yaxshilash choralarini ko‘rish va profilaktik ishlarni amalga oshirish tizimi yaratildi.