SamDCHTI o‘qituvchisi fransiyalik talabalarga dars berdi
Samarqand davlat chet tillar institutida fransuz tili ta’lim yo‘nalishi bo‘yicha 105 nafar talaba va fransuz tili mutaxassisligida 5 nafar magistrant tahsil olmoqda. Kafedrada 20 ta professor-o‘qituvchi va bir nafar xorijlik mutaxassis (Mari Redares Xonim) faoliyat olib boryapti.
– Fransuz tili va adabiyoti kafedrasi jamoasi fransuz tili va madaniyatini yaqindan o‘rganish hamda fransuz tilini xorijiy til sifatida o‘rgatish borasida ko‘plab sa’y-harakatlarni amalga oshirmoqda, – deydi kafedra mudiri dotsent Nigorabonu Suvonova. – Yaqinda institut rektori I.Tuxtasinov hamda fransuz tili va adabiyoti kafedrasi o‘qituvchisi D.Kiselev ikki davlat oliy ta’lim muassasalari o‘rtasidagi hamkorlik aloqalarini yanada yaxshilash hamda hamkor muassasalarni ko‘paytirish maqsadida Fransiyada bo‘ldi. Institutning ayniqsa, Fransiyadagi Quyi Kan universiteti bilan hamkorlik aloqalari yaxshi yo‘lga qo‘yilgan. Bizning o‘qituvchi va o‘quvchilar mazkur oliygohga borib, tajriba orttirib kelmoqda. Masalan, o‘tgan o‘quv yilida kafedramizning ikki nafar iqtidorli talabasi 5 oy davomida tahsil olib qaytdi.
Yaqinda fransuz tili o‘qituvchisi Nigina Po‘latova o‘z pedagogik mahoratini namoyon qilib, “Erasmus+International Credit Mobility” nomli xalqaro grant doirasida Fransiyaning Kan Normandiya universiteti talabalariga bir hafta davomida fransuz tili fani bo‘yicha dars o‘tdi. Shuningdek, fransuz tili va adabiyoti kafedrasi o‘qituvchisi S.Qo‘chqorova Erasmus+ loyihasi doirasida 2018 yilning iyun oyida Fransiyadagi shu universitetda tajriba orttirib qaytdi.
Ta’kidlash joizki, institutning fransuz tili yo‘nalishi talabalari orasidan har yili 3-4 nafari Fransiyadagi “Lions Club” (Fransiyaning xalqaro frankofonlar markazi) ishtirokchisi sifatida bir oylik yozgi ta’til amaliyotida qatnashib, sertifakatlarni qo‘lga kiritmoqda. Shuningdek, institutda muntazam Samarqand shahridagi “Orient Voyage” sayyohlik firmasi bilan hamkorlikda Fransiyalik sayyohlar bilan uchrashuvlar o‘tkaziladi. Ayni paytda institut qoshida Fransuz alyansining filialini tashkil etish borasida muzokaralar olib borilmoqda.
Shu bilan birga, fransuz tili tarjimasiga ham institutda e’tibor katta. Masalan, kafedra professori Ibodullo Mirzayev fransuz tilshunosligi borasidagi ikkita darslikni o‘zbek tiliga tarjima qildi. Kafedra mudiri N.Suvonova Islom Karimovning yuzta hikmatli so‘zini fransuz tiliga tarjima qildi. Shuningdek, o‘qituvchi S.Qo‘chqorova va Islom Karimov nomidagi davlat stipendiyasi sovrindori, 3-bosqich talabasi X.Fayzullayev “O‘zbek xalq ertaklarining fransuzcha tarjimasi” nomli kitobni nashrdan chiqardi. Mazkur tarjima fransuz tilida so‘zlashuvchi halqlarning o‘zbek xalqi madaniyati bilan yaqindan tanishishga yanada yordam beradi.
Samarqand davlat chet tillar instituti tomonidan O‘zbekiston va Fransiya ta’lim tizimi doirasida amalga oshirilgan hamkorlik aloqalari kelgusida ikki davlat munosabatlarini yanada mustahkamlashiga ishonamiz.
