Shahar hokimining qarori bekor qilindi, 64 nafar mansabdor jarimaga tortildi
Biznes-ombudsmanning viloyatdagi xodimlariga joriy yilning 5 oyida tadbirkorlardan 235 ta murojaat keldi va ularning 203 tasi ko‘rib chiqildi. Murojaatlarning 72 tasi ijobiy hal etildi, 131 tasiga normativ-huquqiy hujjatlarga havolalar qilingan holda tushuntirish berildi.
Murojaatlarni sohalar kesimida tahlil qilsak, 60 ta ruxsatnoma, litsenziya va hujjatlar rasmiylashtirish, 40 ta yer ajratish va kompensatsiya, 36 ta bank-kredit, 28 ta surishtiruv-tergov masalasi, 18 ta soliq, 10 ta sud qarorlari va 43 tasi boshqa masalalarni tashkil etdi. Murojaatlar hamda tahlillar asosida tadbirkorlarning buzilgan huquqlarini tiklash yuzasidan davlat organlariga 76 ta ta’sir choralari qo‘llanildi (8 ta taqdimnoma, 4 ta da’vo ariza va 64 ta ma’muriy bayonnoma).
Misol uchun, Kattaqo‘rg‘on shahar hokimining 2020 yil 28 fevraldagi qarori bilan “KURGAN BROTHERS INVEST” MChJga zamonaviy loyihalar asosida yengil konstruksiyali avtobekat tashkil etish uchun yer maydoni ajratish hamda qurilishga ruxsat berish to‘g‘risidagi qarori Yer kodeksi, «Ma’muriy tartib-taomillar to‘g‘risida»gi Qonun talablariga zid ravishda bekor qilingan. Shu bois, shahar hokimining 2021 yil 11 yanvardagi qarorini haqiqiy emas, deb topish to‘g‘risida Samarqand tumanlararo ma’muriy sudiga da’vo ariza kiritildi.
Shuningdek, Biznes-ombudsmanning viloyatdagi xodimlari aralashuvi bilan tadbirkorlik faoliyati uchun 3 milliard so‘mdan ortiq kredit mablag‘i ajratilishi ta’minlandi.
Misol uchun, Paxtachi tumanida faoliyat yurituvchi "Paxtachi avtotex" MChJ rahbari A.To‘raqulovning murojaatiga asosan, jamiyatga 4 kun ichida AT Xalq bankidan 1 milliard 960 million so‘m kredit ajratildi.
Bundan tashqari, nazorat qiluvchi organlarning tadbirkorlar huquqi va qonuniy manfaatlarini himoya qilishi o‘rganilib, 3 203 ta qonunbuzilish holatlari aniqlandi. Buning natijasida 64 nafar mansabdor shaxsdan 81 million so‘m jarima undirildi. Shuningdek, tadbirkorlik sub’yektlarida noqonuniy tekshirish o‘tkazgan 8 ta nazorat qiluvchi organning 44 nafar mansabdor shaxslari (soliq idoralaridan 17 nafar, ekologiya va atrof-muhitni muhofaza qilish inspeksiyasidan 12 nafar, kadastr agentligidan 5 nafar, agroinspeksiyadan 3 nafar, kon-geologiya faoliyatini nazorat qilish inspeksiyasidan 3 nafar, sanitariya-epidimiologik osoyishtalik va jamoat salomatligi xizmatidan 2 nafar, qurilish idorasi va Sanoat xavfsizligi davlat qo‘mitasidan 1 nafar) ga nisbatan qonuniy chora ko‘rildi.
Misol uchun, 2021 yil 3 mart kuni kadastr agentligi Samarqand tumani bo‘limining 2 nafar rahbar xodimi “Karvon-Fayz” MChJ faoliyatida noqonuniy tekshirish o‘tkazganligi uchun ularga nisbatan ma’muriy bayonnoma rasmiylashtirilgan. Sud qarori bilan ularning har biriga bazaviy hisoblash miqdorining 40 baravari - 9 million 800 ming so‘mdan jarima jazosi qo‘llanilgan.
Sh.Hamdamov,
Biznes-ombudsman yetakchi inspektori.
