Tramp AQShda 1 milliondan ortiq kishining koronavirus bilan kasallanganlik holatiga izoh berdi

Bu - dunyodagi eng zo‘r test tahlili tizimining natijasi, dedi Donald Tramp o‘z Tvitter sahifasida.

“AQShda milliondan ziyod fuqaroda koronavirus aniqlanganligi haqidagi xabarlarning yagona sababi shundaki, bizning test tahlili tizimimiz boshqa barcha davlatlarnikidan ko‘p marotaba zo‘r”, deya u boshqa davlatlar test tahlili o‘tkazish bo‘yicha amerikaliklardan shunchaki ortda qolayotganligini, shu sababdan ham ularda kasallanish holati kam qayd etilayotganini qo‘shimcha qildi.

Ayni vaqtda AQSh koronavirus infeksiyasi bilan kasallanish holati bo‘yicha dunyoda yetakchilik qilmoqda. U yerda 1 milliondan ortiq koronavirusning yangi turi bilan kasallanish holati qayd etilgan.

Jons Xopkins universiteti bergan ma’lumotga ko‘ra, mamlakatda 5,7 milliondan ortiq odam test tahlilidan o‘tkazilgan. Shu bilan birga, AQSh o‘lim holatlari bo‘yicha ham dunyoda yetakchilik qilmoqda. Ya’ni, Tramp boshchilik qilayotgan davlatda 58 mingdan ortiq o‘lim holati qayd etilgan va 115 ming nafar bemor sog‘aygan. Bugungi kungacha dunyo bo‘ylab 3,1 milliondan ortiq kasallanish holati aniqlangan.