XDP “Milliy tiklanish” ustidan prokuraturaga murojaat qildi
O‘zbekistondagi siyosiy partiyalardan biri O‘zXDP “Milliy tiklanish” demokratik partiyasi ustidan prokuraturaga ariza berdi. Bu haqda O‘zXDPning rasmiy bayonotida aytildi:
"Milliy tiklanish" demokratik partiyasi rasmiy nashri “Milliy tiklanish” gazetasining 2019 yil 1 noyabrdagi 39-40 (1038)-soni 10-sahifasida “O‘zXDP a’zosi Maqsuda Vorisovaning Rossiya kommunistlar partiyasi yetakchisi Gennadiy Zyuganovga qanday “qarindosh”ligi bor”ligi haqida yasama suratli anons chop etilgan edi.
O‘zXDP Markaziy Kengashi Maqsuda Vorisovaning sha’ni va qadr-qimmatini qonunchilikka muvofiq himoya qilishni so‘rab, tegishli tartibda Yunusobod tuman prokuraturasiga murojaat yo‘lladi.
Ma’lumki, "Milliy tiklanish" demokratik partiyasi markaziy apparati rahbar-xodimlari ushbu partiya milliy qadriyat va an’analarni yuksak darajada qadrlashi va himoya qilishi haqida ko‘p gapiradi. Partiyaning dasturiy hujjatlarida bu yo‘nalishda qator g‘oya va takliflar, shiorlar ilgari surib kelinadi.
Shunga qaramay, "Milliy tiklanish" demokratik partiyasi o‘z g‘oyalariga qarshi ravishda, xalqimiz yuksak darajada qadrlaydigan ayol, ona sha’nini pisand qilmayotgani bizda taassuf uyg‘otadi”.
