Xitoyda zilzila tufayli 11 ming kishi evakuatsiya qilindi

Yevropa O‘rtayer dengizi seysmologiya markazi ma’lumotlariga ko‘ra, seshanba kuni 935 mingga yaqin aholi istiqomat qiluvchi Baoshan shahridan 35 kilometr shimoli-sharqda 5,3 magnitudali zilzila sodir bo‘lgan.

Baoshan shahridan 11 mingga yaqin odamni evakuatsiya qildi. Bu haqda chorshanba kuni “Sinszinbao” gazetasi xabar berdi.

Unga ko‘ra, qutqaruv ishlariga 2,4 ming kishi safarbar qilingan. Dastlabki hisob-kitoblarga ko‘ra, zilzila oqibatida 2,8 mingga yaqin bino vayron bo‘lgan.

Vakolatli organlar 38 ming kishining xavfsizligini ta’minlash uchun favqulodda choralar ko‘rgan. Ular uchun 34 ta vaqtinchalik boshpana tashkil etilgan.

Dastlabki ma’lumotlarga ko‘ra, zilzila oqibatida halok bo‘lganlar yo‘q. Uch kishi yengil tan jarohati olib, yaqin atrofdagi shifoxonaga yetkazilgan.