Сеул миллий университети профессори СамДУ талабаларига дарс ўтди

Жанубий Кореянинг Террагейтс тўлқинларининг биологик тизими маркази директори, Сеул миллий университети физика ва астрономия факультети профессори Гун-Сик Парк Самарқанд давлат университетига ташриф буюрди.

Гун-Сик Парк ҳамда СамДУнинг собиқ талабаси, Сеул миллий университети профессори Матлабжон Сатторов физика факультети профессор-ўқитувчилари ва талабалари билан учрашув ўтказди.

Меҳмонлар Террагейтс тўлқинларининг биологик тизими маркази ҳамкорлигида СамДУда Фотон ва электроника марказини ташкил этиш, физика, тиббиёт, қишлоқ хўжалиги ва ҳарбий соҳани ривожлантиришга доир янги лойиҳаларни Самарқанддаги ишлаб чиқариш жараёнларига татбиқ этиш масалаларини муҳокама қилди.

Кореялик профессор ўзбек олимлари билан ҳамкорликда янги ғоя ва технологиялар яратиш, самарқандлик истеъдодли талабаларни танлов асосида Сеул университетига ўқишга қабул қилиш таклифини билдирди.

Шундан сўнг Гун-Сик Парк талабалар учун “Физика фанининг ҳозирги замон долзарб муаммолари” мавзусида маҳорат дарси ўтди. Дарсда профессор Террагейтс тўлқинларининг хавфсизлигини таъминлаш ва унинг атроф-муҳит муҳофазаси, инсон соғлигини мустаҳкамлашда муҳим аҳамият касб этишини илмий ва назарий жиҳатдан тушунтирди.

Дилмурод ДЎСТМУРОДОВ.