АҚШда намойишчилар Колумб хайкалини йиқитишди
Виржиния штатининг Ричмонд шаҳридаги намойишчилар Христофор Колумб хотирасига ўрнатилган хайкални йиқитиб, кўлга ташлаб юборишди. Бу ҳақда маҳаллий WRIC телеканали хабар берди.
Тақдим этилган маълумотга кўра, 9 июнь куни кечқурун Берд Парк боғи ичида мингга яқин намойишчилар йиғилган. Намойиш дастлаб тинч ўтаётган бўлган. Воқеа гувоҳларининг сўзларига кўра, маҳаллий вақт билан соат 20:30 (Тошкент вақти билан 05:30) атрофида намойишчилар арқонлар ёрдамида хайкални йиқитишган. Сўнг ёдгорликни боғ ёнида жойлашган кўлга судраб боришган ва сувга улоқтиришган.
Намойишчилардан бирининг таъкидлашича, бундай тадбирнинг амалга оширилиши олдиндан режалаштирилмаган бўлган.
Сўнгги бир неча кунлардан бери афроамерикалик Жорж Флойд ўлими сабабли АҚШнинг кўплаб йирик шаҳарларида норозилик намойишлари авж олди. Ўтказилаётган норозилик намойишлари оммавий тартибсизликлар ва полиция билан тўқнашувларга сабаб бўлмоқда.
