IIV Kattaqo‘rg‘onda YPX xodimlari bilan bog‘liq voqea yuzasidan bayonot berdi
Kattaqo‘rg‘on tumanida YPX inspektorlari faoliyati jarayonida fuqaro vafot etganligi borasida yolg‘on yoki noxolis axborot tarqalishining oldini olish maqsadida Ichki ishlar vazirligi munosabat bildirdi.
Prokuratura organlari tomonidan holat yuzasidan jinoyat ishi qo‘zg‘atilganligi va tergov harakatlari olib borilayotganligini ma’lum qilamiz, deyiladi munosabatda.
Jumladan:
O‘zbekiston Respublikasi Konstitutsiyasining 26-moddasiga ko‘ra, “Jinoyat sodir etganlikda ayblanayotgan har bir shaxsning ishi sudda qonuniy tartibda, oshkora ko‘rib chiqilib, uning aybi aniqlanmaguncha u aybdor hisoblanmasligi belgilangan.
Jinoyat protsessual kodeksining 23-moddasi (Aybsizlik prezumpsiyasi)da “Gumon qilinuvchi, ayblanuvchi yoki sudlanuvchi uning jinoyat sodir etishda aybdorligi qonunda nazarda tutilgan tartibda isbotlangunga va qonuniy kuchga kirgan sud hukmi bilan aniqlangunga qadar aybsiz hisoblanishi” qayd etilib, mavjud qonunchilik talablariga amal qilinmagan holda munosabat bildirishi natijasida ommada salbiy ijtimoiy fikr shakllanishiga sabab bo‘lishi mumkin.
Shuningdek, jurnalistika faoliyati bilan shug‘ullanadigan har bir shaxs bevosita “Axborot olish kafolatlari va erkinligi to‘g‘risida”gi qonunning 11-moddasi (axborotning to‘g‘riligi uchun javobgarlik)da qayd etilgan, ya’ni ommaviy axborot vositalarida e’lon qilinayotgan axborotning to‘g‘riligini tekshirib ko‘rishlari shartligi va ular axborot beruvchi bilan birgalikda uning to‘g‘riligi uchun qonun hujjatlarida belgilangan tartibda javobgar bo‘lishlari hamda “Ommaviy axborot vositalari to‘g‘risida”gi Qonunning 5-moddasi (ommaviy axborot vositalarining erkinligi)da ommaviy axborot vositalari qonun hujjatlariga muvofiq axborotni izlash, olish, tadqiq etish, tarqatish, undan foydalanish, uni saqlash huquqiga egaligi hamda tarqatilayotgan axborotning xolisligi va ishonchliligi uchun belgilangan tartibda javobgar bo‘lishi belgilanganligi haqidagi normalardan bevosita xabardor bo‘lishlari lozim.
Shu bilan birga, shaxsning qadr-qimmati kamsitilishiga yoki uning obro‘sizlantirilishiga olib keladigan yolg‘on yoki noxolis axborotni tarqatish, shu jumladan, ommaviy axborot vositalarida, telekommunikatsiya tarmoqlarida yoki internet jahon axborot tarmog‘ida tarqatish qonunchilikka asosan javobgarlikka tortilishi uchun asos bo‘lishi mumkinligini eslatib o‘tamiz.
IIV axborot xizmati.
