Iroqlik askar saylov uchastkasi oldida o‘z xizmatdoshini otib qo‘ydi
Iroq xavfsizlik xizmati agentligi xabariga ko‘ra, iroqlik askar Diyala provinsiyasidagi saylov uchastkasi oldida adashib, o‘z xizmatdoshini otib o‘ldirdi.
Avvalroq xavfsizlik manbasi RIA Novosti agentligiga Iroq sharqidagi Diyala provinsiyasidagi saylov uchastkasiga qurolli hujum uyushtirilishi oqibatida ikki iroqlik askar yaralanganini ma’lum qilgan edi.
«Ba’zi ijtimoiy tarmoqlar va ommaviy axborot vositalari xavfsizlik muammosi yoki Diyala provinsiyasidagi saylov markaziga qurolli hujum va otishma haqida xabar tarqatdi. Mojaro harbiylardan biri o‘z xizmatdoshini otib o‘ldirib, bir kishini yaralagani tufayli kelib chiqqan», deyiladi xabarda.
Iroqda mahalliy vaqt bilan soat 07:00da saylov uchastkalari ochildi. Bu 2003 yildan beri mamlakatda o‘tkazilgan birinchi navbatdan tashqari parlament saylovlari. Vakillar kengashi (Parlament) 329 kishidan iborat. Ularning vakolat muddati to‘rt yil. Iroq parlamenti deputatligi uchun 3240 dan ortiq nomzod, jumladan, 951 nafar ayol kurashmoqda. 160 ga yaqin partiya ro‘yxatga olingan.
Saylovlar munosabati bilan Iroq hukumati barcha aeroport va chegara punktlarini yopdi. Iroq xavfsizlik kuchlari yuqori shay holatda. Saylov komissiyasi ma’lumotlariga ko‘ra, 40 milliondan ortiq aholisi bo‘lgan Iroqda 25 milliondan ortiq saylovchilar bor.
Prezident Barxam Saleh 2020 yil noyabr oyida namoyishchilar 2019 yil oktyabr oyida hukumatga qarshi namoyish boshlanganidan so‘ng talab qilingan yangi saylov qonunini ma’qulladi. Muddatidan oldin parlament saylovlari 2021 yil 6 iyunga rejalashtirilgan edi. Lekin keyin Oliy saylov komissiyasi tavsiyasiga binoan 10 oktyabrga qoldirildi. Komissiya partiya alyanslari ishtiroki uchun ariza berishga ko‘proq vaqt berish kerak deb hisobladi. Iroqda avvalgi parlament saylovlari 2018 yil may oyida bo‘lib o‘tgan edi.
