Ishtixonda noyob qush — Tasqara topib olgan shaxs uni ekologiya bo‘limiga topshirdi

Tumanning «Qiyot» mahallasida yashovchi Ergashali Mustanov o‘zining uyi atrofiga bir qanoti yaralangan noma’lum yovvoyi yirtqich qush kelib qolgani ko‘rgan. Ko‘rinishidan mahalliy qushlarga o‘xshamaganligi sababli tabiatga befarq bo‘lmagan ushbu fuqaro, mutaxassislarga murojaat qilgan.
Aniqlanishicha, ushbu qush burgutsimonlar oilasiga mansub Tasqara qushi bo‘lib, O‘zbekiston Respublikasi "Qizil kitobi"ga kiritilgan.

Ayni paytda mazkur qush tuman ekologiya, atrof-muhitni muhofaza qilish va iqlim o‘zgarishi bo‘limi davlat inspektorlari tomonidan qabul qilib olinib, Zarafshon milliy tabiat bog‘ining reabilitatsiya markaziga maxsus tibbiy ko‘rikdan o‘tkazish maqsadida topshirilgan. U tez orada tabiat qo‘yniga qo‘yib yuborilishi aytilmoqda.