Kasaba uyushmalari ko‘magida hisobchi ishga tiklandi

Toyloq tumanida joylashgan Veterinariya ilmiy-tekshirish institutida o‘n yildan buyon bosh hisobchi bo‘lib ishlab kelgan Jo‘rabek Jalilov bilan tuzilgan mehnat shartnomasi 2025 yil 21 yanvarda ish beruvchi tomonidan bekor qilinib, u o‘z vazifasidan ozod qilindi.

Bundan norozi bo‘lgan bosh hisobchi mehnatga oid huquqlarini tiklashda amaliy yordam so‘rab O‘zbekiston kasaba uyushmalari federatsiyasi viloyat kengashiga murojaat qildi.

– Kasaba uyushmalari viloyat kengashi raisining yuridik masalalar bo‘yicha maslahatchisi T.Eshmonov va bo‘lim mutaxassislari tomonidan murojaatim qonuniy ko‘rib chiqilib, buzilgan huquqlarimni tiklash bo‘yicha hujjatlarni o‘rganishdi, – deydi J.Jalilov. – Natijada ish beruvchi tomonidan mehnat qonunchiligi talablari, mehnat shartnomasini bekor qilish bo‘yicha yo‘l qo‘yilgan kamchiliklar tuzatilib, yana o‘z ishimga qayta tiklandim. Fuqarolarning, xususan, ishchi-xodimlarning mehnatga oid haq-huquqlarini tiklash hamda ijtimoiy-iqtisodiy manfaatlarini himoya qilishda kasaba uyushmalarining o‘rni katta ekaniga yana bir bor amin bo‘ldim.

D.To‘xtayev.