Samarqanddagi chorvachilik yo‘nalishidagi xo‘jaliklar hamda qoramollar soni bugun yana o‘zgardi

Kecha, 18 dekabr kuni Zarnews.uz saytida e’lon qilingan “Samarqandda naslli qoramollar soni nechta?” sarlavhali maqola yuzasidan “O‘zagroinspeksiya”ning Samarqand viloyati boshqarmasi quyidagilarni ma’lum qiladi.

“Samarqand viloyatida chorvachilikning barcha yo‘nalishida 1574 ta xo‘jalik yurituvchi sub’yektlar faoliyat yuritmoqda. Shundan, qoramolchilik xo‘jaliklari 709 ta, qo‘ychilik xo‘jaliklari 178 ta, echkichilik 7 ta, yilqichilik 2 ta, parrandachilik 199 ta, baliqchilik 465 ta va quyonchilik yo‘nalishida 14 ta xo‘jaliklar faoliyat olib bormoqda.

Viloyatda mavjud 709 ta qoramolchilik xo‘jaliklarida 53 ming 353 bosh chorva mollari boqilmoqda. Joriy yilda 100 dan ortiq naslchilik yo‘nalishidagi fermer xo‘jaliklari tomonidan xorijdan 1 ming 790 bosh zotdor chorva mollari keltirildi.

Joriy yilning 1 oktyabr holatiga viloyatda qoramolchilik yo‘nalishida 111 ta, qo‘ychilik yo‘nalishida 8 ta, parrandachilik yo‘nalishida 12 ta, quyonchilik yo‘nalishida 1 ta va asalarichilik yo‘nalishida 1 ta naslchilik xo‘jaliklari mavjud bo‘lib, qoramolchilik yo‘nalishidagi naslchilik xo‘jaliklarida 21 mingdan ortiq naslli mollar parvarishlanmoqda”.

“O‘zagroinspeksiya”ning Samarqand viloyati boshqarmasi axborot xizmati”.