Sana: 5 oktyabr – Xalqaro o‘qituvchilar kuni

YuNESKOning 1966 yil 5 oktyabrda Parij shahrida bo‘lib o‘tgan 14-sessiyasida Xalqaro Mehnat Tashkiloti bilan hamkorlikda "O‘qituvchilarning maqomi to‘g‘risida tavsiyanoma" qabul qilingan.
Mazkur hujjatda o‘qituvchilarning huquq va majburiyatlari, ular uchun yaratilishi zarur bo‘lgan eng muhim shart-sharoitlar bo‘yicha xalqaro me’yorlar belgilangan.
Shu munosabat bilan ushbu sana 1994 yildan beri Xalqaro o‘qituvchilar kuni sifatida nishonlab kelinadi.

Ushbu kun 100 dan ortiq davlatda keng nishonlanib, o‘qituvchilarning insoniyat hayoti va jahon taraqqiyotida tutgan o‘rni va ahamiyatini, ularning mehnat sharoitlarini yaxshilash va huquqlarini himoya qilishga e’tibor qaratish lozimligini eslatib turadi.