Sayyor qabul natijasida 2 nafar sudlanuvchi qamoqdan ozod qilindi
Samarqand viloyati sudlari raislari hamkorligida Samarqand va Kattaqo‘rg‘on shaharlari, Toyloq, Jomboy, Bulung‘ur, Past Darg‘om, Samarqand tumanlari Xalq qabulxonalarida fuqarolar bilan sayyor qabullar tashkil qilindi.
Sayyor qabul jarayonida jinoyat ishlari bo‘yicha 83, fuqarolik ishlari bo‘yicha 4, ma’muriy ishlar bo‘yicha 2 murojaat tushdi. Murojaatlarning aksariyati ijobiy hal qilindi, ayrimlariga huquqiy tushuntirish berildi.
Shuningdek, sayyor sudlarda 62 nafar shaxs Jinoyat kodeksining 73-moddasiga asosan jazoni o‘tashdan muddatidan oldin ozod qilindi hamda ma’muriy ishlar yuzasidan Ma’muriy javobgarlik to‘g‘risidagi kodeksning 271-moddasi 11-bandiga asosan 16 nafar shaxsga nisbatan ishlar tugatildi. Jinoyat ishlari bo‘yicha Kattaqo‘rg‘on shahar sudining 2021 yil 8 yanvardagi hukmi va ajrimiga ko‘ra 2 nafar sudlanuvchi qamoqdan ozod qilindi.
