Seul milliy universiteti professori SamDU talabalariga dars o‘tdi

Janubiy Koreyaning Terrageyts to‘lqinlarining biologik tizimi markazi direktori, Seul milliy universiteti fizika va astronomiya fakulteti professori Gun-Sik Park Samarqand davlat universitetiga tashrif buyurdi.

Gun-Sik Park hamda SamDUning sobiq talabasi, Seul milliy universiteti professori Matlabjon Sattorov fizika fakulteti professor-o‘qituvchilari va talabalari bilan uchrashuv o‘tkazdi.

Mehmonlar Terrageyts to‘lqinlarining biologik tizimi markazi hamkorligida SamDUda Foton va elektronika markazini tashkil etish, fizika, tibbiyot, qishloq xo‘jaligi va harbiy sohani rivojlantirishga doir yangi loyihalarni Samarqanddagi ishlab chiqarish jarayonlariga tatbiq etish masalalarini muhokama qildi.

Koreyalik professor o‘zbek olimlari bilan hamkorlikda yangi g‘oya va texnologiyalar yaratish, samarqandlik iste’dodli talabalarni tanlov asosida Seul universitetiga o‘qishga qabul qilish taklifini bildirdi.

Shundan so‘ng Gun-Sik Park talabalar uchun “Fizika fanining hozirgi zamon dolzarb muammolari” mavzusida mahorat darsi o‘tdi. Darsda professor Terrageyts to‘lqinlarining xavfsizligini ta’minlash va uning atrof-muhit muhofazasi, inson sog‘ligini mustahkamlashda muhim ahamiyat kasb etishini ilmiy va nazariy jihatdan tushuntirdi.

Dilmurod DO‘STMURODOV.